نیوز ڈیسک
کراچی: پولیس نے سرجانی ٹاؤن میں خاتون اور ان کے تین بچوں کے قتل کے کیس میں ایک مشتبہ ملزم کو گرفتار کرنے کا دعویٰ کیا ہے، جبکہ پولیس کے مطابق ملزم کے قبضے سے واردات میں استعمال ہونے والا مبینہ آلہ بھی برآمد کر لیا گیا ہے۔
ڈی آئی جی ویسٹ عرفان بلوچ نے پریس کانفرنس میں بتایا کہ گرفتار ملزم کی شناخت ہمایوں کے نام سے ہوئی ہے اور پولیس کے مطابق اس نے خاتون اور ان کے تین بچوں کے قتل کا اعتراف کیا ہے۔
پولیس کے مطابق ہمایوں مقتولہ کے شوہر کا سالا ہے اور تقریباً ڈیڑھ سال قبل اس خاندان سے کرائے پر مکان حاصل کر چکا تھا۔
ڈی آئی جی ویسٹ کے مطابق نیو کراچی کا رہائشی ملزم مبینہ طور پر واردات کے روز دوپہر تقریباً ڈھائی بجے متاثرہ خاندان کے گھر پہنچا، جہاں اسے معلوم تھا کہ خاتون کا شوہر گھر پر موجود نہیں ہوگا۔
پولیس کے بیان کے مطابق ملزم نے خاتون کے ساتھ مبینہ زیادتی کی کوشش کی، مزاحمت پر اسے اور اس کی ایک بیٹی کو قتل کر دیا۔ پولیس کا کہنا ہے کہ خاتون کے دیگر بچے سہ پہر تقریباً 3 بجے مدرسے سے گھر واپس آئے، جس کے بعد ملزم نے مبینہ طور پر دروازہ کھول کر انہیں بھی قتل کر دیا۔
پولیس کے مطابق ملزم تقریباً دوپہر 2 بجے سے شام 4 بجے تک گھر میں موجود رہا اور واردات کو مبینہ طور پر ڈکیتی کا رنگ دینے کی کوشش کی۔
ڈی آئی جی نے بتایا کہ تفتیش کے دوران حاصل ہونے والے شواہد اور معلومات کی مدد سے ملزم تک رسائی حاصل کی گئی، جس کے بعد اسے گرفتار کرکے مبینہ طور پر قتل میں استعمال ہونے والا آلہ بھی برآمد کر لیا گیا۔
واضح رہے کہ اس سے قبل سرجانی ٹاؤن کے سیکٹر 7-D میں ایک گھر سے مہوش نامی خاتون اور ان کے تین بچوں کی لاشیں برآمد ہوئی تھیں۔ واقعے کے بعد پولیس نے مختلف پہلوؤں سے تحقیقات شروع کی تھیں۔
پولیس کے مطابق گرفتار ملزم سے مزید تفتیش جاری ہے، جبکہ کیس سے متعلق مزید شواہد بھی اکٹھے کیے جا رہے ہیں۔
