نیوز ڈیسک
اسلام آباد: پاکستان میں سوشل میڈیا پلیٹ فارمز کے ضوابط مزید سخت کرنے کی تجاویز پر غور شروع کر دیا گیا ہے۔
ذرائع کے مطابق وزارتِ داخلہ نے اس معاملے پر متعلقہ اداروں اور دیگر فریقین سے مشاورت کرنے کا فیصلہ کیا ہے۔ مجوزہ اقدامات کا مقصد سوشل میڈیا پر بچوں کے استحصال اور فحش مواد سے متعلق بڑھتے ہوئے خدشات سے نمٹنا ہے۔
ذرائع کا کہنا ہے کہ سوشل میڈیا صارفین کے لیے کم از کم عمر کی حد مقرر کرنے کی تجویز بھی زیرِ غور ہے، جبکہ ’فیملی ولاگنگ‘ کے نام پر مبینہ طور پر فحش یا نامناسب مواد کی تشہیر روکنے کے لیے بھی اقدامات تجویز کیے جا رہے ہیں۔
حکام کی جانب سے دیگر ممالک میں نافذ سوشل میڈیا ضوابط کا بھی جائزہ لیا جائے گا، جس میں بعض پلیٹ فارمز پر پابندی یا ان کی رسائی محدود کرنے سے متعلق اقدامات بھی شامل ہیں۔
وزارتِ داخلہ کے زیرِ اہتمام اجلاس میں پاکستان ٹیلی کمیونیکیشن اتھارٹی (PTA)، نیشنل سائبر کرائم انویسٹی گیشن ایجنسی (NCCIA) اور وفاقی و صوبائی پولیس کے حکام شریک ہوں گے۔
اجلاس میں بچوں کے استحصال اور فحش مواد سے متعلق کیسز کا جائزہ لینے کے ساتھ ساتھ آسٹریلیا سمیت مختلف ممالک میں سوشل میڈیا کے حوالے سے اختیار کیے گئے ضوابطی ماڈلز کا بھی مطالعہ کیا جائے گا۔
ذرائع کے مطابق مجوزہ ضوابط اور دیگر اقدامات سے متعلق حتمی فیصلہ متعلقہ اداروں اور فریقین سے مشاورت کے بعد کیا جائے گا۔
