ویب ڈیسک
بوليوڈ کے مسٹر پرفیکشنسٹ عامر خان نے تصدیق کی ہے کہ وہ دبنگ ہیرو سلمان خان اور بوليوڈ بادشاہ شاہ رخ خان کے ساتھ ایک مشترکہ فلم پر کام کر رہے ہیں۔
اگرچہ تینوں خانز نے ماضی میں مختصر کرداروں یا مرکزی کرداروں میں ایک ساتھ فلموں میں کام کیا ہے، لیکن یہ پہلی بار ہوگا جب وہ ایک مکمل فلم میں ایک ساتھ نظر آئیں گے۔
خان تینوں کو بوليوڈ انڈسٹری میں 25 سال سے زیادہ کا تجربہ ہے اور انہیں بھارتی فلم انڈسٹری میں لیجنڈ کا درجہ حاصل ہے۔ ان کی فلمیں نہ صرف ہندوستان بلکہ پاکستان سمیت پوری دنیا میں مقبول ہیں۔
یہ مشترکہ فلم یقینی طور پر ایک بڑا بلاک بسٹر بننے کی توقع ہے، کیونکہ یہ تینوں سپر اسٹارز کو ایک ساتھ بڑے پردے پر پیش کرے گی۔
کئی سال سے افواہیں ہیں کہ تینوں خانز جلد ہی کسی فلم میں ایک ساتھ دکھائی دیں گے لیکن اس حوالے سے تینوں خانز نے کبھی کھل کر بات نہیں کی۔
اب پہلی بار عامر خان نے تصدیق کی ہے کہ وہ سلمان خان اور شاہ رخ خان کے ساتھ مشترکہ فلم بنانے کے منصوبے پر کام کر رہے ہیں۔
عامر خان نے نیٹ فلیکس پر نشر ہونے والے کپل شرما شو میں شرکت کی اور ان سے وہاں بولی وڈ کے خانز کے ساتھ کام کرنے سے متعلق سوال کیا گیا۔
عامر خان نے مداح کے سوال کا جواب دیتے ہوئے تصدیق کی کہ وہ اور باقی دو خان مشترکہ طور پر فلم بنانے کے منصوبے پر کام کر رہے ہیں۔ وہ فی الحال اسکرپٹ اور کرداروں پر بات چیت کر رہے ہیں۔
انہوں نے کہا کہ انہوں نے شاہ رخ خان اور سلمان خان سے کہا ہے کہ “ہم تینوں نے انڈسٹری میں کئی سال گزارے ہیں اور ہمارے کروڑوں مداح ہمیں ایک ساتھ دیکھنا چاہتے ہیں۔ اگر ہم ایک ساتھ کام نہیں کرتے ہیں تو یہ ان مداحوں کے ساتھ ناانصافی ہوگی۔”
عامر خان نے مزید کہا کہ ان کے سلمان خان اور شاہ رخ خان کے ساتھ دوستانہ تعلقات ہیں اور سلمان خان اکثر انہیں کپڑے تحفے میں دیتے رہتے ہیں۔
انہوں نے تصدیق کی کہ تینوں خان ایک ہی فلم میں کام کرنے کے لیے مل کر کام کر رہے ہیں، تاہم انہوں نے اس حوالے سے مزید کوئی تفصیلات نہیں بتائیں۔
عامر خان کی کپل شرما شو میں پہلی بار شرکت کی ویڈیو سوشل میڈیا پر وائرل ہو گئی ہے اور مداح اس بات پر خوشی کا اظہار کر رہے ہیں کہ وہ آخر کار کئی سالوں بعد بڑے پردے پر تینوں خانز کو ایک ساتھ دیکھیں گے۔
