اسلام آباد:پاکستان شوبز انڈسٹری کی معروف اداکارہ درفشاں سلیم کی خفیہ طور پر بنائی گئی ویڈیو منظرِ عام پر آنے کے بعد معروف شخصیات کی پرائیویسی سے متعلق نئی بحث چھڑ گئی ہے۔
فوٹو اور ویڈیو شیئرنگ پلیٹ فارم انسٹاگرام پر ان دنوں ایک ویڈیو وائرل ہو رہی ہے جس میں اداکارہ لندن کی سڑکوں پر سیر و تفریح کر رہی ہیں۔ یہ ویڈیو ایک مداح نے خفیہ طور پر ریکارڈ کر کے سوشل میڈیا پر شیئر کی ہے۔
ویڈیو میں دیکھا جا سکتا ہے کہ درفشاں سلیم لندن کی شاہراہ پر اپنے پیاروں کے ساتھ سیر کر رہی تھیں جب ایک گلوکار ان کے مقبول ڈرامے ’عشق مرشد‘ کا گانا گا رہا تھا۔ اداکارہ نے اس گلوکار کو ریکارڈ کیا اور پھر آگے بڑھ گئیں۔
وائرل ویڈیو سے واضح ہوتا ہے کہ یہ ویڈیو درفشاں سلیم کی اجازت کے بغیر بنائی گئی تھی، جس کے بعد سوشل میڈیا پر فنکاروں کی پرائیویسی کے حوالے سے نئی بحث کا آغاز ہوگیا ہے۔
سوشل میڈیا صارفین ویڈیو ریکارڈ کرنے والے مداح پر شدید تنقید کر رہے ہیں اور فنکاروں کی پرائیویسی کا احترام کرنے کی تاکید کر رہے ہیں۔
بعض صارفین اداکارہ کو وزن کم کرنے کا مشورہ بھی دے رہے ہیں۔
