گوگل چیٹ کے ذریعے اب دوستوں اور ساتھیوں کے ساتھ رابطے میں رہنا زیادہ آسان ہوگا، کیونکہ اب اس میں وائس میسجز کا فیچر شامل کر دیا گیا ہے۔
گوگل ورک اسپیس کے انسٹنٹ میسجنگ ٹول میں اب تک ٹیکسٹ اور تصویری سپورٹ موجود تھی، مگر اب وائس میسجز بھیجنا ممکن ہوگا۔
یہ فیچر ابتدائی طور پر اینڈرائیڈ اور آئی او ایس ڈیوائسز کے لیے متعارف کرایا جا رہا ہے، جبکہ ویب ورژن میں بھی جلد صارفین کے لیے شامل کیا جائے گا۔ گوگل کے مطابق صارفین وائس میسجز کو ڈائریکٹ میسجز، گروپ چیٹس اور اسپیسز میں بھیج سکیں گے۔
کمپنی نے بتایا کہ وائس میسجز بھیجنے سے وقت کی بچت ہوتی ہے اور صارف کے لیے آسان ہوتا ہے۔ یہ فیچر بائی ڈیفالٹ ان ایبل ہوگا مگر صارفین اسے ڈس ایبل بھی کر سکتے ہیں، اور وائس میسجز پر کسی ٹیکسٹ میسج کی طرح ریپلائی کرنا بھی ممکن ہوگا۔ اس فیچر کو استعمال کرنے کا طریقہ بھی بہت آسان ہے۔
کسی چیٹ ونڈو میں مائیکرو فون کے آئیکون پر کلک کریں، وائس مسیج ریکارڈ کریں اور پھر سینڈ کریں۔ صارفین میسج سینڈ کرنے سے قبل اس کا جائزہ لے سکتے ہیں تاکہ بھیجنے کا حتمی فیصلہ کریں۔
