ملزمان دن میں ریکی، رات کو وارداتیں کرتے تھے، پولیس

اسلام آباد پولیس کے انسدادِ رابری و ڈکیتی یونٹ نے بڑی کارروائی کرتے ہوئے گھریلو چوری کی وارداتوں میں ملوث ایک منظم اور سابقہ ریکارڈ یافتہ کباڑی گینگ کے سرغنہ سمیت تین ارکان کو گرفتار کر لیا۔
پولیس کے مطابق گرفتار ملزمان میں سدھیر، عبدالرحمان اور وحید اللہ شامل ہیں، جو دن کے وقت رہائشی علاقوں میں گھروں کی ریکی کرتے اور رات کے اوقات میں وارداتیں انجام دیتے تھے۔ ملزمان تھانہ لوہی بھیر اور تھانہ بنی گالہ کے متعدد مقدمات میں پولیس کو مطلوب تھے۔
کارروائی کے دوران پولیس نے ملزمان کے قبضے سے ایک کروڑ 15 لاکھ روپے سے زائد مالیت کا مسروقہ سامان برآمد کیا، جس میں پاکستانی و غیر ملکی کرنسی، قیمتی گھڑیاں، موبائل فونز، ٹیبلٹ، طلائی زیورات اور دیگر قیمتی اشیاء شامل ہیں۔ وارداتوں میں استعمال ہونے والا اسلحہ بھی برآمد کر لیا گیا ہے۔
ڈی آئی جی اسلام آباد محمد جواد طارق نے کارروائی کی تصدیق کرتے ہوئے کہا کہ اسلام آباد پولیس منظم اور متحرک جرائم پیشہ گینگوں کے خلاف بڑے پیمانے پر کریک ڈاؤن جاری رکھے ہوئے ہے۔ انہوں نے کہا کہ شہریوں کے جان و مال کا تحفظ پولیس کی اولین ترجیح ہے اور ایسے عناصر کے خلاف بلاامتیاز کارروائیاں جاری رہیں گی۔
پولیس کا کہنا ہے کہ ملزمان سے مزید تفتیش جاری ہے اور امکان ہے کہ انکشافات کی روشنی میں دیگر ساتھیوں کی گرفتاری بھی عمل میں لائی جائے گی۔