این ڈی ایم اے کا گلگت بلتستان، آزاد کشمیر اور بلوچستان میں بارش و برفباری کا الرٹ جاری

اسلام آباد: نیشنل ڈیزاسٹر مینجمنٹ اتھارٹی (این ڈی ایم اے) کے نیشنل ایمرجنسیز آپریشن سینٹر (این ای او سی) نے گلگت بلتستان، آزاد جموں و کشمیر اور بلوچستان میں متوقع بارش اور برفباری کے پیشِ نظر موسمی الرٹ جاری کر دیا ہے۔

این ای او سی کے مطابق بلوچستان کے بیشتر اضلاع میں آئندہ 24 سے 48 گھنٹوں کے دوران وقفے وقفے سے بارش متوقع ہے۔ ژوب، قلعہ سیف اللہ، زیارت، پشین، کوئٹہ اور گردونواح میں بارش کا امکان ظاہر کیا گیا ہے۔

اسی طرح گلگت بلتستان اور آزاد کشمیر میں بارش جبکہ بالائی اور پہاڑی علاقوں میں برفباری کی پیشگوئی کی گئی ہے۔ اسکردو، ہنزہ، غذر، استور، دیامر اور شگر میں بارش اور برفباری کا امکان ہے۔

این ڈی ایم اے نے خبردار کیا ہے کہ برفباری کے دوران پہاڑی علاقوں میں سڑکوں پر پھسلن کے باعث ٹریفک کی روانی متاثر ہو سکتی ہے۔ مسافروں کو ہدایت کی گئی ہے کہ پہاڑی علاقوں میں سفر کے دوران انتہائی احتیاط برتیں اور حفاظتی تدابیر اختیار کریں۔ پرانے یا کمزور ٹائروں والی گاڑیوں کو پہاڑی علاقوں میں لے جانے سے گریز کرنے کی ہدایت بھی جاری کی گئی ہے۔

اتھارٹی نے عوام کو غیر ضروری سفر سے اجتناب کرنے کا مشورہ دیتے ہوئے کہا ہے کہ اگر برفباری کے دوران سفر ناگزیر ہو تو سنو چین، اضافی فیول اور دیگر ضروری سامان ہمراہ رکھنا یقینی بنایا جائے۔

ممکنہ متاثرہ علاقوں میں سفر کے دوران انتظامیہ کے ساتھ تعاون، جاری کردہ ہدایات پر عمل اور موسمی صورتحال سے باخبر رہنے پر بھی زور دیا گیا ہے۔

این ڈی ایم اے نے موسمی صورتحال اور ممکنہ خطرات کے پیشِ نظر صوبائی اور ضلعی انتظامیہ کو الرٹ رہنے اور پیشگی اقدامات کرنے کی ہدایت کر دی ہے۔ این ڈی ایم اے کے مطابق این ای او سی تمام صورتحال کی مسلسل نگرانی کر رہا ہے اور ممکنہ خطرات سے متعلق پیشگی آگاہی اور ضروری معلومات متعلقہ اداروں تک فراہم کی جا رہی ہیں۔