ایران اسرائیل جنگ شدت اختیار کرگئی، خلیجی ممالک نے فضائی حدود بند کردیں، پروازیں منسوخ
مشرقِ وسطیٰ میں کشیدگی خطرناک حد تک بڑھ گئی ہے۔ ایران پر اسرائیل اور امریکا کے مشترکہ حملوں کے بعد اب خلیجی ممالک میں موجود امریکی فوجی اڈوں کو نشانہ بنایا جا رہا ہے۔ اطلاعات کے مطابق بحرین کے دارالحکومت مناما میں امریکی بحریہ کے پانچویں بحری بیڑے کے ہیڈکوارٹر پر میزائل حملہ کیا گیا ہے، جس کی بحرینی حکام نے تصدیق بھی کر دی ہے۔ وزارت داخلہ نے شہریوں کو گھروں میں رہنے اور مرکزی شاہراہوں سے دور رہنے کی ہدایت جاری کی ہے۔
رپورٹس کے مطابق کویت، قطر، متحدہ عرب امارات اور سعودی عرب میں بھی دھماکوں اور سائرن کی آوازیں سنی گئی ہیں۔ دوحہ میں دو دھماکوں کی اطلاع ملی تاہم قطری وزارت دفاع کا کہنا ہے کہ ایران کی جانب سے داغے گئے میزائل دفاعی نظام نے فضا ہی میں تباہ کر دیے اور صورتحال مکمل کنٹرول میں ہے۔ ابوظبی اور ریاض سے بھی دھماکوں کی خبریں سامنے آئی ہیں۔
دوسری جانب ایرانی میڈیا کا دعویٰ ہے کہ اسرائیل کی جانب درجنوں بیلسٹک میزائل داغے گئے ہیں، تل ابیب اور حیفہ میں دھماکوں کی آوازیں سنی گئیں۔ ایک ایرانی سینئر عہدیدار نے سخت پیغام دیتے ہوئے کہا ہے کہ خطے میں موجود تمام امریکی اور اسرائیلی اثاثے ہدف ہوں گے اور اس جنگ کے اثرات طویل اور وسیع ہوں گے۔
ادھر متحدہ عرب امارات نے عارضی طور پر اپنی فضائی حدود بند کر دی ہیں جبکہ ایران کی وزارت داخلہ نے شہریوں کو پرسکون رہنے کی ہدایت کی ہے۔ مجموعی طور پر صورتحال نہایت نازک ہے اور عالمی برادری کی تشویش میں مسلسل اضافہ ہو رہا ہے۔
