اسرائيل اور امریکا کے حملوں کے بعد ایران کی جوابی کارروائی، خلیجی ممالک نے فضائی حدود بند کردی

اسرائيل اور امریکا کے ایران پر مشترکہ حملے کے بعد خطے میں کشیدگی شدید ہو گئی ہے، ایران نے بھی جوابی کارروائی کرتے ہوئے امریکی اہداف کو نشانہ بنانا شروع کر دیا ہے، جبکہ صورتحال کے باعث قطر، کویت، متحدہ عرب امارات اور عراق سمیت متعدد خلیجی ممالک نے اپنی فضائی حدود بند کر کے بین الاقوامی و داخلی پروازیں معطل کر دی ہیں۔ مختلف ایئرلائنز جن میں ویز ایئر، لوفتھانسا، کے ایل ایم اور عمان ایئر شامل ہیں، نے اسرائیل، دبئی، ابوظبی، مسقط اور دیگر شہروں کی پروازیں منسوخ کر دی ہیں، روس اور کویت نے بھی ایران اور اسرائیل کے لیے فضائی آپریشن روک دیے ہیں۔ اسرائیلی وزیر دفاع نے اعلان کیا ہے کہ ایران کے خلاف حملے شروع کر دیے گئے ہیں، جس کے بعد مشرقِ وسطیٰ میں سلامتی کی صورتحال نہایت سنگین ہو چکی ہے اور عالمی سطح پر تشویش بڑھ رہی ہے۔