تہران (ویب ڈیسک) – ایران کے وزیر خارجہ Abbas Araghchi نے کہا ہے کہ امریکا کی نام نہاد سیکیورٹی بری طرح ناکام ہو چکی ہے اور اب وہ آبنائے ہرمز کو محفوظ بنانے کے لیے دوسروں سے مدد مانگ رہا ہے۔
سماجی رابطے کی ویب سائٹ ایکس پر جاری اپنے پیغام میں عباس عراقچی نے دعویٰ کیا کہ امریکا آبنائے ہرمز کی حفاظت کے لیے چین سے بھی مدد طلب کر رہا ہے۔
انہوں نے کہا کہ امریکا کا سیکیورٹی نظام خطرات کو روکنے کے بجائے مزید مسائل کو جنم دے رہا ہے۔ ایرانی وزیر خارجہ نے خلیجی ممالک سے مطالبہ کیا کہ وہ اپنے خطے سے غیر ملکی جارح قوتوں کو نکالیں۔
عباس عراقچی کا کہنا تھا کہ خلیجی ممالک میں موجود غیر ملکی طاقتوں کی اصل ترجیح صرف اسرائیل کا تحفظ ہے۔
دوسری جانب ایرانی وزیر خارجہ نے ایک امریکی خبر رساں ادارے کو دیے گئے انٹرویو میں ایران، امریکا اور اسرائیل کے درمیان جاری کشیدگی کے مختلف پہلوؤں پر بھی بات کی۔
بی بی سی کی رپورٹ کے مطابق انہوں نے نئے ایرانی سپریم لیڈر مجتبیٰ خامنہ ای سے متعلق خبروں، آبنائے ہرمز کی صورتحال اور خطے میں جاری حملوں کے بارے میں ایران کا مؤقف پیش کیا۔
مجتبیٰ خامنہ ای کے زخمی ہونے کی خبروں پر ردعمل دیتے ہوئے عباس عراقچی نے کہا کہ جلد واضح ہو جائے گا کہ اس حوالے سے کوئی مسئلہ نہیں ہے۔ ان کا کہنا تھا کہ نیا سپریم لیڈر اپنی ذمہ داریاں انجام دے رہے ہیں اور آئندہ بھی بدستور اپنے فرائض سرانجام دیتے رہیں گے۔
