تہران (ویب ڈیسک) – ایران کے خاتم الانبیاء ہیڈکوارٹرز نے امریکا اور اسرائیل پر سنگین الزامات عائد کرتے ہوئے کہا ہے کہ دشمن میدانِ جنگ میں ناکامی کے بعد اب دھوکہ دہی اور سازشوں کا سہارا لے رہا ہے۔
ایرانی میڈیا کے مطابق ایرانی مسلح افواج نے عمان کی بندرگاہوں پر ہونے والے ڈرون حملوں میں ملوث ہونے کی سختی سے تردید کی ہے۔ حکام کا کہنا ہے کہ امریکا ایرانی ساختہ شاہد ڈرون کی نقل استعمال کر کے تہران کو بدنام کرنے کی کوشش کر رہا ہے۔
ترجمان کے مطابق ایران کی کارروائیاں صرف امریکی اور صیہونی فوجی اہداف تک محدود ہیں اور کسی شہری یا تجارتی ہدف کو نشانہ بنانے سے ایران کا کوئی تعلق نہیں۔ اسی طرح ایرانی سرکاری ٹی وی نے عراقی کردستان میں لاناز ریفائنری پر ہونے والے حملے سے بھی لاتعلقی کا اظہار کیا ہے۔
ایران نے پڑوسی ممالک کو خبردار کیا ہے کہ وہ خطے کے اتحاد کو نقصان پہنچانے والی دشمن کی چالوں سے ہوشیار رہیں۔ اس دوران برطانوی وزارت دفاع نے بھی اعتراف کیا ہے کہ قبرص میں گرنے والا ڈرون ایران سے نہیں بھیجا گیا تھا۔
دوسری جانب سعودی عرب میں ایران کے سفیر نے ریاض میں امریکی سفارت خانے پر حملے کے الزامات کو مسترد کر دیا ہے۔ جبکہ ایرانی وزیر خارجہ نے الزام لگایا ہے کہ اسرائیل آذربائیجان میں حملے کروا کر تہران اور باکو کے تعلقات خراب کرنے کی کوشش کر رہا ہے۔
ایران نے علاقائی ممالک سے مطالبہ کیا ہے کہ ان سازشوں کو ناکام بنانے کے لیے باہمی تعاون کو فروغ دیا جائے۔
