ٹیکنالوجی کمپنی Meta نے اعلان کیا ہے کہ وہ 8 مئی 2026 سے Instagram کے براہ راست پیغامات (DMs) میں اینڈ ٹو اینڈ انکرپشن کا آپشن ختم کر دے گی۔ کمپنی کے مطابق یہ فیصلہ اس فیچر کے کم استعمال کی وجہ سے کیا گیا ہے۔
یہ فیچر 2021 میں متعارف کرایا گیا تھا جس کا مقصد صارفین کو زیادہ محفوظ اور نجی پیغام رسانی کی سہولت فراہم کرنا تھا، تاہم کمپنی کا کہنا ہے کہ بہت کم صارفین نے ڈی ایمز کے لیے انکرپشن کو فعال کیا، جس کے باعث اسے مرحلہ وار ختم کیا جا رہا ہے۔
میٹا کے مطابق جن صارفین نے پہلے سے انکرپٹڈ چیٹس فعال کر رکھی ہیں، انہیں فیچر بند ہونے سے پہلے اپنے پیغامات اور میڈیا ڈاؤن لوڈ کرنے کے لیے ہدایات فراہم کی جائیں گی۔
کمپنی نے مزید کہا کہ جو صارفین زیادہ مضبوط پرائیویسی چاہتے ہیں وہ WhatsApp استعمال کر سکتے ہیں، جہاں تمام پیغامات اور کالز کے لیے اینڈ ٹو اینڈ انکرپشن پہلے سے ڈیفالٹ کے طور پر فعال ہے۔
واضح رہے کہ انسٹاگرام پر یہ فیچر خودکار طور پر فعال نہیں تھا بلکہ صارفین کو اسے دستی طور پر آن کرنا پڑتا تھا۔ کمپنی نے اس کے متبادل کے طور پر فی الحال کسی نئے پرائیویسی فیچر کا اعلان نہیں کیا۔
اس فیصلے پر ڈیجیٹل پرائیویسی کے حامیوں نے تشویش کا اظہار کرتے ہوئے کہا ہے کہ انکرپشن کے خاتمے سے محفوظ رابطوں کے اختیارات کم ہو سکتے ہیں۔
یہ پیش رفت ایسے وقت میں سامنے آئی ہے جب TikTok نے بھی اعلان کیا ہے کہ وہ اپنے پلیٹ فارم پر اینڈ ٹو اینڈ انکرپٹڈ ڈی ایمز متعارف نہیں کرائے گا کیونکہ اس سے قانون نافذ کرنے والے اداروں اور حفاظتی ٹیموں کے لیے پیغامات کی نگرانی مشکل ہو سکتی ہے۔
