امریکی ریاست ٹیکساس کی ایک نوجوان لڑکی میکی کرین کو دنیا میں سب سے لمبی ٹانگوں والی خاتون قرار دیا گیا ہے۔
میکی کرین کی عمر 21 سال ہے اور ان کا قد 6 فٹ 10 انچ ہے، جس میں ان کے ایک پیر کی لمبائی 53.3 انچ اور دوسرے کی لمبائی 52.8 انچ ہے۔
اس غیر معمولی قد کی وجہ سے انہیں اپنی روزمرہ کی زندگی میں مشکلات کا سامنا کرنا پڑتا ہے۔ 21 سالہ نوجوان خاتون کو دنیا میں سب سے لمبی ٹانگوں والی خاتون قرار دیا گیا ہے، جس کی وجہ سے وہ سوشل میڈیا پر بھی وائرل ہیں اور ان کا نام گنیز ورلڈ ریکارڈز میں بھی شامل ہے۔
میکی کرین کو سوشل میڈیا پر مختلف ملے جلے ردعملوں کا سامنا کرنا پڑتا ہے، جہاں ان کے لیے نفرت انگیز تبصرے بھی کیے جاتے ہیں، لیکن میکی کرین ان منفی تبصروں پر توجہ نہیں دیتیں اور انہیں اپنی لمبی ٹانگوں اور اپنی خصوصیتوں پر فخر ہے۔
میکی کرین کا کہنا ہے کہ کوئی بھی میرے جیسا نہیں ہے، میں اپنے اسکول میں سب سے لمبی ہونا پسند نہیں کرتی تھی، میں دوسری جماعت میں تھی تو باہر کھیلتے ہوئے کسی نے میرے ساتھ مذاق کیا کہ میں کیا مڈل اسکول کی طالب علم ہوں کیونکہ میرا قد لمبا تھا۔
نوجوان خاتون کا کہنا ہے کہ انہیں کپڑوں کی خریداری اور دیگر کئی معاملات میں مشکلات کا سامنا کرنا پڑتا ہے۔ غیر ملکی میڈیا کے مطابق، میکی کرین غیر معمولی جسمات والی خواتین کو مستقل اور قابل قبول بنانا چاہتی ہیں۔
