لندن: پاکستانی سپر اسٹار ماہرہ خان نے لندن میں برٹش ایشین ٹرسٹ کے سالانہ ڈنر اور استقبالیہ تقریب میں شرکت کرتے ہوئے کنگ چارلس اور ٹرسٹ کی جانب سے ذہنی صحت کے شعبے میں اقدامات کو سراہا ہے۔
دی پینسولا لندن میں منعقدہ اس تقریب کے موقع پر میڈیا سے گفتگو کرتے ہوئے ماہرہ خان نے کہا کہ انہیں برٹش ایشین ٹرسٹ کے رائل سرپرست کنگ چارلس سے ملاقات کا اعزاز حاصل ہوا اور انہوں نے جنوبی ایشیا میں فلاحی کاموں کے لیے ان کی مسلسل دلچسپی کو قابلِ تحسین قرار دیا۔
ماہرہ خان، جو برٹش ایشین ٹرسٹ میں ذہنی صحت کی سفیر کے طور پر کام کر رہی ہیں، نے پاکستان میں ذہنی بیماری سے متعلق پائے جانے والے سماجی داغ کو ختم کرنے کی ضرورت پر زور دیا۔
انہوں نے کہا کہ ڈپریشن اور ذہنی دباؤ جیسے مسائل کو اب بھی سنجیدگی سے نہیں لیا جاتا، حالانکہ یہ دیگر جسمانی بیماریوں کی طرح توجہ اور علاج کے مستحق ہیں۔
تقریب میں 300 سے زائد شخصیات شریک ہوئیں، جن میں مخیر حضرات، فنکار اور برطانوی ایشیائی کمیونٹی کے نمایاں افراد شامل تھے۔ منتظمین کے مطابق ایونٹ میں ایک ملین پاؤنڈ سے زائد رقم فلاحی منصوبوں کے لیے جمع کی گئی۔
