بنوں: ضلع بنوں کے علاقے مارکہ بیرہ میں دھماکے کے نتیجے میں 7 افراد جاں بحق جبکہ 3 افراد زخمی ہو گئے۔
ڈسٹرکٹ پولیس آفیسر (ڈی پی او) یاسر آفریدی کے مطابق دھماکے میں مسافر وین اور ایک کار کو نشانہ بنایا گیا۔ وین ہاتھی خیل گاؤں سے بنوں کی طرف جا رہی تھی کہ راستے میں دھماکہ ہوا۔
ڈی پی او نے بتایا کہ وین میں سوار 5 مسافر اور کار میں موجود 2 افراد موقع پر ہی جاں بحق ہو گئے جبکہ 3 افراد زخمی ہوئے۔ زخمیوں اور لاشوں کو فوری طور پر خلیفہ گل نواز ٹیچنگ ہسپتال منتقل کر دیا گیا ہے۔
پولیس کے مطابق ابتدائی تحقیقات سے ظاہر ہوتا ہے کہ دھماکہ سڑک کنارے نصب بارودی مواد کے ذریعے کیا گیا۔ واقعے کی نوعیت اور ذمہ دار عناصر کا تعین کرنے کے لیے تفتیش شروع کر دی گئی ہے۔
ادھر علاقے میں سیکیورٹی سخت کر دی گئی ہے اور بم ڈسپوزل یونٹ نے شواہد اکٹھے کر لیے ہیں۔
واضح رہے کہ یکم جون کو بھی بنوں کے علاقے میریان میں نامعلوم افراد نے گیس پائپ لائن کو دھماکے سے اڑا دیا تھا، جس سے مختلف علاقوں کو گیس کی فراہمی متاثر ہوئی تھی۔
اسی طرح پشاور میں کوہاٹ روڈ پر بھی بارودی مواد کا دھماکہ ہوا تھا، تاہم اس واقعے میں کوئی جانی یا مالی نقصان رپورٹ نہیں ہوا تھا۔
پولیس حکام کے مطابق تمام واقعات کی مختلف پہلوؤں سے تحقیقات جاری ہیں۔
