راولپنڈی/مری:ڈسٹرکٹ پولیس آفیسر (ڈی پی او) مری ڈاکٹر محمد رضا تنویر نے محرم الحرام کے دوران امن و امان اور سیاحوں کی سہولت کو یقینی بنانے کے لیے جامع سیکیورٹی پلان کی منظوری دے دی ہے اور ٹریول ایڈوائزری جاری کر دی ہے۔
اتوار کو جاری کیے گئے ویڈیو پیغام میں ڈی پی او نے بتایا کہ 10 محرم الحرام کا مرکزی جلوس مرکزی امام بارگاہ لوئر بازار سے مقررہ وقت پر برآمد ہو کر مال روڈ سے ہوتا ہوا پرامن طور پر اپنے اختتام کو پہنچے گا۔
انہوں نے کہا کہ سیکیورٹی انتظامات کے تحت 9 اور 10 محرم کو مری مال روڈ اور اس کے ملحقہ علاقوں میں عام ٹریفک اور سیاحتی نقل و حرکت پر مکمل یا جزوی پابندیاں عائد رہیں گی۔
ڈی پی او کے مطابق یہ اقدامات جلوس کے پرامن انعقاد اور عوام کی حفاظت کو یقینی بنانے کے لیے کیے جا رہے ہیں۔ انہوں نے سیاحوں سے اپیل کی کہ وہ جاری کردہ ٹریول ایڈوائزری پر سختی سے عمل کریں تاکہ کسی بھی قسم کی پریشانی سے بچا جا سکے۔
انہوں نے واضح کیا کہ مال روڈ کے مخصوص سیکیورٹی زونز کے علاوہ مری کے دیگر تمام سیاحتی مقامات اور تفریحی جگہیں بدستور عوام کے لیے کھلی رہیں گی۔
ڈاکٹر محمد رضا تنویر نے کہا کہ سیاح متبادل راستوں اور مقامات کی طرف باآسانی سفر کر سکتے ہیں جبکہ مری پولیس سیکیورٹی کو یقینی بنانے اور سیاحوں کی رہنمائی کے لیے ہائی الرٹ رہے گی۔
انہوں نے مزید کہا کہ شہری اور سیاح مری پولیس کی آفیشل موبائل ایپلیکیشن “سیف ٹورازم مری” سے رہنمائی حاصل کر سکتے ہیں، جس کے ذریعے لائیو ٹریفک اپ ڈیٹس، متبادل راستوں اور سیکیورٹی معلومات فراہم کی جا رہی ہیں۔
ڈی پی او نے کہا کہ تمام اقدامات کا مقصد محرم کے دوران مذہبی اجتماعات کے پرامن انعقاد کے ساتھ ساتھ سیاحوں کی سہولت کو یقینی بنانا ہے۔
