اسلام آباد:پاکستانی گلوکار سجاد علی کا مقبول گانا “راوی” بھارتی میوزک ریئلٹی شو “پنجاب ماسٹر چیمپس” میں پیش کیے جانے کے بعد سوشل میڈیا پر نئی بحث چھڑ گئی ہے۔
بھارتی پروگرام کے ایک مدمقابل نے سجاد علی کا گانا “راوی” پیش کیا، جبکہ اسی شو میں ایک اور مدمقابل نے پاکستانی گلوکار عاصم اظہر کا گانا “میری زندگی ہے تو” بھی گایا۔
ان پرفارمنس کے بعد سوشل میڈیا پر صارفین نے غیر ملکی ٹیلی ویژن پروگراموں میں پاکستانی گانوں کے استعمال اور ان کے لیے درکار اجازت سے متعلق سوالات اٹھائے۔
بعض صارفین نے اس واقعے کا موازنہ سجاد علی کے اس سابقہ فیصلے سے کیا، جب انہوں نے ایک پاکستانی میوزک شو میں اپنے گانے کی پرفارمنس کی اجازت نہیں دی تھی۔ اس وقت ان کے فیصلے پر ملے جلے ردعمل سامنے آئے تھے۔ کچھ صارفین نے اسے بطور کاپی رائٹ ہولڈر ان کا قانونی حق قرار دیا، جبکہ بعض نے اس فیصلے پر تنقید بھی کی تھی۔
بھارتی شو میں ان کے گانے کی پرفارمنس کے بعد سوشل میڈیا پر یہ سوال بھی اٹھایا جا رہا ہے کہ آیا اس استعمال کے لیے باقاعدہ اجازت حاصل کی گئی تھی اور کیا سجاد علی اس حوالے سے کوئی مؤقف اختیار کریں گے۔
تاہم خبر لکھے جانے تک سجاد علی کی جانب سے اس معاملے پر کوئی باضابطہ بیان جاری نہیں کیا گیا، جبکہ یہ بھی واضح نہیں کہ گانے کی پرفارمنس کے لیے پیشگی اجازت حاصل کی گئی تھی یا نہیں۔
سجاد علی پاکستان کے معروف گلوکار، موسیقار اور نغمہ نگار ہیں۔ چار دہائیوں پر محیط اپنے فنی سفر میں انہوں نے متعدد مقبول گانے پیش کیے اور پاکستان سمیت دنیا بھر میں ایک بڑی مداحوں کی تعداد حاصل کی۔
