ںیوز ڈیسک
اسلام آباد: فیڈرل گورنمنٹ ایمپلائز ہاؤسنگ اتھارٹی (FGEHA) نے اعلان کیا ہے کہ سیکٹر جی-13/1 میں اپارٹمنٹ منصوبے پر تعمیراتی کام جولائی کے آخر یا اگست کے آغاز میں دوبارہ شروع ہونے کا امکان ہے، تاہم اس کے لیے اتھارٹی کے بورڈ کی حتمی منظوری درکار ہوگی۔
ایف جی ای ایچ اے کے ڈائریکٹر اسٹاف فیض عمر نے اے پی پی سے گفتگو کرتے ہوئے بتایا کہ اتھارٹی اس وقت سیکٹر جی-13 میں سرکاری ملازمین کے لیے دو اپارٹمنٹ منصوبوں پر کام کر رہی ہے۔
انہوں نے کہا کہ کشمیر ہائٹس اپارٹمنٹ منصوبے پر تعمیراتی سرگرمیاں 7 جولائی سے دوبارہ شروع کر دی جائیں گی، جس کے لیے تمام ضروری انتظامات مکمل کر لیے گئے ہیں۔
جی-13/1 کے دوسرے اپارٹمنٹ منصوبے کے بارے میں انہوں نے بتایا کہ اس سے متعلق تمام انتظامی اور قانونی کارروائیاں، جو پہلے ایم/ایس EHFPRO (پرائیویٹ) لمیٹڈ کے ذریعے انجام دی جا رہی تھیں، اپنے آخری مراحل میں داخل ہو چکی ہیں۔
فیض عمر کے مطابق ایف جی ای ایچ اے بورڈ کے آئندہ اجلاس میں منظوری ملتے ہی منصوبے پر تعمیراتی کام جولائی کے آخر یا اگست کے پہلے ہفتے میں دوبارہ شروع کر دیا جائے گا۔
انہوں نے کہا کہ دونوں منصوبوں پر تعمیراتی سرگرمیوں کی بحالی سے سرکاری ملازمین کو رہائشی سہولتوں کی فراہمی میں تیزی آئے گی اور طویل عرصے سے تعطل کا شکار منصوبوں کی تکمیل کی راہ ہموار ہوگی۔
