اسلام آباد
پاکستان کرکٹ ٹیم کے سابق کپتان وسیم اکرم نے سوشل میڈیا پر گردش کرنے والی اپنی موت کی جھوٹی افواہوں کو مسترد کرتے ہوئے مداحوں سے جعلی خبروں پر یقین نہ کرنے کی اپیل کی ہے۔
وسیم اکرم نے اپنے انسٹاگرام اکاؤنٹ پر شیئر کی گئی ایک ویڈیو میں مزاحیہ انداز اپناتے ہوئے کہا کہ گزشتہ چند روز سے ان کی موت سے متعلق بے بنیاد افواہیں پھیلائی جا رہی ہیں۔
انہوں نے کہا، “امید ہے سب خیریت سے ہوں گے۔ پچھلے چند دنوں سے سوشل میڈیا پر میری موت کی جھوٹی افواہیں گردش کر رہی ہیں۔ اگر لوگ اس جدید دور میں بھی جعلی خبروں اور حقیقت میں فرق نہیں کر سکتے تو پھر میں کیا کہوں؟ میں تو ابھی صرف 60 سال کا لڑکا ہوں۔”
سابق کپتان نے ان افراد پر بھی طنز کیا جو انہیں پیغامات بھیج کر ان کی خیریت دریافت کر رہے تھے۔ انہوں نے مسکراتے ہوئے کہا، “ان تمام لوگوں کو 21 توپوں کی سلامی جو مجھے میسج کر کے پوچھ رہے ہیں، ‘کیا آپ زندہ ہیں؟’ نہیں، میں یہ ویڈیو اپنی موت کے بعد بنا رہا ہوں۔”
وسیم اکرم نے جعلی ویڈیوز اور جھوٹی معلومات پھیلانے والوں پر تنقید کرتے ہوئے کہا کہ اگر وہ اپنی تخلیقی صلاحیتوں کو مثبت کاموں میں استعمال کریں تو زیادہ بہتر نتائج حاصل کر سکتے ہیں۔
انہوں نے کہا، “جن لوگوں نے کرکٹرز کے بارے میں جعلی ویڈیوز بنانے پر اتنی محنت کی، اگر وہ یہی صلاحیت کسی مثبت کام میں استعمال کریں تو بہت آگے جا سکتے ہیں۔”
اپنی گفتگو کے دوران وسیم اکرم نے ایک پنجابی کہاوت کا حوالہ دیتے ہوئے کہا کہ “گدھے پر کتابیں لاد دینے سے وہ عالم نہیں بن جاتا۔” ان کا کہنا تھا کہ عقل و دانش نقل سے نہیں بلکہ سمجھ بوجھ سے حاصل ہوتی ہے۔
واضح رہے کہ گزشتہ چند روز کے دوران سوشل میڈیا پر وسیم اکرم کی موت سے متعلق جھوٹی خبریں تیزی سے پھیل رہی تھیں، جس کے باعث ان کے مداحوں میں تشویش پائی جا رہی تھی۔ تاہم سابق کپتان نے خود ویڈیو پیغام جاری کر کے ان تمام افواہوں کی تردید کر دی۔
