نیوز ڈیسک
واشنگٹن: امریکا میں وسط مدتی انتخابات کے لیے ابتدائی ووٹنگ کا عمل جاری ہے، جس کے دوران صدر ڈونلڈ ٹرمپ اور خاتونِ اول میلانیا ٹرمپ نے فلوریڈا کے شہر ویسٹ پام بیچ میں قائم پولنگ اسٹیشن پر اپنا حقِ رائے دہی استعمال کیا۔
ووٹ ڈالنے کے بعد صدر ٹرمپ نے صحافیوں سے گفتگو کرتے ہوئے بتایا کہ انہوں نے اپنی جماعت ریپبلکن پارٹی کے امیدواروں کو ووٹ دیا ہے۔ بعد ازاں وہ انتخابی مہم کے سلسلے میں ایک ریلی سے خطاب کرنے کے لیے ریاست جارجیا روانہ ہوگئے۔
صحافیوں سے گفتگو کے دوران ٹرمپ نے امریکا میں بدعنوانی کے معاملے پر ڈیموکریٹک پارٹی کو تنقید کا نشانہ بنایا۔ انہوں نے دعویٰ کیا کہ بدعنوانی کا مسئلہ بالخصوص ان شہروں اور اضلاع میں زیادہ ہے جہاں ڈیموکریٹس کی حکومت ہے۔
وسط مدتی انتخابات میں اب صرف چند روز باقی رہ گئے ہیں، جبکہ رائے عامہ کے جائزوں کے مطابق ریپبلکن پارٹی کو ایوانِ نمائندگان میں اپنی اکثریت برقرار رکھنے کے لیے سخت مقابلے کا سامنا کرنا پڑ سکتا ہے۔
سینیٹ میں بھی جماعت کی پوزیشن غیر یقینی قرار دی جا رہی ہے، جس کے باعث کانگریس میں اپنی برتری برقرار رکھنے کے حوالے سے خدشات بڑھ رہے ہیں۔
امریکا میں وسط مدتی انتخابات کو برسرِ اقتدار جماعت کی سیاسی مقبولیت اور حکومتی کارکردگی کا اہم امتحان سمجھا جاتا ہے۔
ان انتخابات کے نتائج کانگریس میں طاقت کے توازن پر اثرانداز ہو سکتے ہیں، جس سے صدر ٹرمپ کے لیے اپنی مدتِ صدارت کے بقیہ عرصے میں قانون سازی اور حکومتی ترجیحات پر عمل درآمد کی راہ بھی متعین ہوگی۔
