ویب ڈیسک
بھارتی میڈیا کی رپورٹس کے مطابق، ٹائمز میگزین نے سال 2024 کی دنیا کی 100 بااثر شخصیات کی فہرست میں عالیہ بھٹ کو شامل کر لیا ہے۔ عالیہ بھٹ نے ٹام ہارپر کی ہدایت کاری میں بننے والی فلم ‘ہارٹ آف اسٹون’ سے ہالی ووڈ میں اپنا قدم رکھا ہے۔
ٹام ہارپر نے انٹرویو میں عالیہ بھٹ کی تعریف کی اور ان کی ذہانت کو سراہتے ہوئے انہیں زبردست ذہانت کی حامل شخصیت قرار دیا۔ ان کا کہنا ہے کہ انہوں نے عالیہ بھٹ سے پہلی ملاقات فلم ‘ہارٹ آف اسٹون’ کے سیٹ پر کی تھی، جو ان کی انگریزی زبان میں پہلی فلم تھی، اور شہرت کے باوجود وہ بہت عاجزانہ مزاج کی مالک تھیں۔
انہوں نے مزید اظہار کیا کہ عالیہ کی خاص صلاحیت یہ ہے کہ وہ جانتی ہیں کہ کیسے ایک فلمی اسٹار کی پُرکشش شخصیت کو حساسیت اور صداقت کے ساتھ ملانا ہے۔ ایک اداکارہ کے طور پر ان کا کام بہت نمایاں ہے۔ ان کی تخلیقی صلاحیتیں انہیں ایک انٹرنیشنل اسٹار بناتی ہیں۔
فوٹو اینڈ ویڈیو شیئرنگ پلیٹ فارم انسٹاگرام پر، عالیہ بھٹ نے یہ خبر شیئر کرتے ہوئے ٹام ہارپر کا خاص شکریہ ادا کیا۔ انہوں نے پوسٹ شیئر کرتے ہوئے کیپشن میں لکھا کہ ٹائمز میگزین کی سال 2024 کے لیے دنیا کی 100 بااثر شخصیات کی فہرست میں شامل ہونے کا اعزاز حاصل ہوا۔ اتنے اچھے الفاظ میں میری تعریف کرنے کے لیے ٹام ہارپر آپ کا بہت بہت شکریہ۔
واضح رہے کہ عالیہ بھٹ واحد اداکارہ ہیں جنہوں نے رواں سال ٹائم میگزین کی شائع ہونے والی دنیا کی 100 بااثر شخصیات کی اس فہرست میں جگہ بنائی ہے۔
