باجوڑ:خیبرپختونخوا کے ضلع باجوڑ میں پولیس گاڑی کے قریب بم دھماکے کے نتیجے میں تین اہلکار زخمی ہوگئے ہیں۔
ڈپٹی سپرنٹنڈنٹ آف پولیس (ڈی ایس پی) عبدالعزیز کے مطابق، دھماکے کے وقت اسٹیشن ہاؤس افسر (ایس ایچ او) شاہ پور خان معمول کی گشت پر تھے، اور پولیس کی گاڑی سڑک کے کنارے نصب بم سے ٹکرائی۔
زخمی اہلکاروں کو ہیڈکوارٹر ہسپتال خار منتقل کیا گیا ہے، اور علاقے میں سرچ آپریشن شروع کر دیا گیا ہے۔
یہ واقعہ اس وقت پیش آیا جب دو روز قبل پشاور کے خزانہ شوگر مل کے قریب کچرے کے ڈھیر میں بارودی مواد کے دھماکے میں ایک 10 سالہ بچہ جاں بحق ہو گیا تھا۔بچے نے کچرے سے بارودی مواد اٹھایا تھا۔
اس کے علاوہ، 22 ستمبر کو سوات میں غیر ملکی سفرا کے قافلے کی سیکیورٹی پر مامور پولیس وین کو بھی نشانہ بنایا گیا تھا، جس کے نتیجے میں ایک اہلکار شہید اور چار زخمی ہو گئے تھے۔
