اسلام آباد:بالی ووڈ کی معروف ہارر کامیڈی فلم ’بھول بھلیاں‘ کا تیسرا سیکویل کب ریلیز ہوگا؟ تاریخ سامنے آگئی ہے۔
فلم میں مرکزی کردار نبھانے والے اداکار کارتک آریان نے بھول بھلیاں 3 کا پہلا ٹیزر جاری کرتے ہوئے اپنے چاہنے والوں کو دیوالی کا تحفہ بھی دے دیا ہے۔انہوں نے بتایا کہ یکم نومبر کو دیوالی کے موقع پر روح بابا اور مونجولیکا کا مقابلہ ہوگا۔
فلم ’بھول بھلیاں 3‘ میں کارتک آریان، ٹرپتی ڈمری، مادھوری ڈکشٹ اور ودیا بالن مرکزی کردار ادا کر رہے ہیں۔
ودیا بالن کی اپنے کردار مونجولیکا سے واپسی نے شائقین کی دلچسپی بڑھا دی ہے، جبکہ کچھ شائقین فلم کے پہلے حصے میں مرکزی کردار نبھانے والے اداکار اکشے کمار کی کمی بھی محسوس کر رہے ہیں۔
ڈانسنگ کوئین مادھوری ڈکشٹ کی فلم میں شمولیت شائقین کی دلچسپی کو مزید بڑھا رہی ہے۔
فلم کے تیسرے حصے کی ہدایات انیس بزمی نے دی ہیں، اور یہ پروڈکشن کمپنی ’ٹی سیریز‘ کے بینر تلے ریلیز کی جائے گی۔
کامیڈی ہارر فرنچائز کا پہلا حصہ 2007ء میں ریلیز ہوا اور وہ سال کی کامیاب ترین فلم بن گیا، جس میں اکشے کمار، ودیا بالن اور راجپال یادو سمیت دیگر نے شاندار اداکاری کی۔
بعد ازاں 2022ء میں اس کا دوسرا پارٹ ریلیز ہوا، جس میں کارتک آریان، تبو اور کیارا اڈوانی کو شامل کیا گیا۔
