نیوزڈیسک
اسلام آباد:امریکہ نے اس سال اپنی سخت امیگریشن پالیسی کے تحت چھ ہزار سے زائد طلبہ کے ویزے منسوخ کر دیے ہیں۔
امریکی محکمہ خارجہ کے مطابق زیادہ تر ویزے قانون شکنی یا طے شدہ مدت سے زائد قیام کی وجہ سے منسوخ کیے گئے، جبکہ کچھ طلبہ کے ویزے دہشت گردی کی حمایت کے باعث بھی منسوخ ہوئے۔
تفصیلات کے مطابق، ٹرمپ انتظامیہ نے سوشل میڈیا کی جانچ پڑتال اور اسکریننگ کے عمل کو بڑھا دیا ہے تاکہ غیر قانونی سرگرمیوں میں ملوث افراد کی شناخت کی جا سکے۔
تقریباً چار ہزار ویزے قانون شکنی، حملے، منشیات یا شراب کے زیر اثر ڈرائیونگ اور دیگر جرائم کی وجہ سے منسوخ کیے گئے، جبکہ دو سو سے تین سو ویزے دہشت گردی کی حمایت کے باعث ختم کیے گئے۔
امریکی وزیر خارجہ مارکو روبیو کا کہنا ہے کہ انہوں نے سیکڑوں یا شاید ہزاروں افراد کے ویزے منسوخ کیے، جن میں طلبہ بھی شامل ہیں، کیونکہ یہ لوگ امریکی خارجہ پالیسی کی ترجیحات کے خلاف سرگرمیوں میں ملوث تھے۔
دوسری جانب، ٹرمپ کے نقادوں نے اس اقدام کو امریکی آئین کی پہلی ترمیم کے تحت آزادی اظہار پر حملہ قرار دیا ہے۔
اس سال امریکی محکمہ خارجہ نے بیرون ملک امریکی سفارتکاروں کو ہدایت دی تھی کہ وہ امریکا مخالف یا سیاسی سرگرمیوں میں ملوث درخواست گزاروں کے خلاف سخت نگرانی کریں۔
