نیوزڈیسک
اسلام آباد: بھارت نے شنگھائی تعاون تنظیم (SCO) میں آذربائیجان کے مکمل رکن بننے کی راہ میں رکاوٹ ڈال دی ہے۔
روسی میڈیا کے مطابق آذربائیجان کے میڈیا نے دعویٰ کیا ہے کہ بھارت نے ایک بار پھر باکو کو SCO کا مکمل رکن بننے سے روک دیا۔
رپورٹس کے مطابق، آذربائیجان کے صدر الہام علییوف نے وزیر اعظم شہباز شریف سے تیانجن، چین میں ملاقات کے دوران یہ معاملہ اٹھایا اور کہا کہ پاکستان کے ساتھ تعاون کرنے پر بھارت عالمی تنظیموں میں انتقام لینے کی کوشش کر رہا ہے۔
صدر علییوف کا مزید کہنا ہے کہ وہ بھارت کے خلاف کامیابی پر پاکستان کو مبارکباد پیش کرتے ہیں اور آذربائیجان اور پاکستان کے برادرانہ تعلقات مضبوط ہیں، جس سے بھارت ناخوش ہے۔
SCO سن دو ہزار ایک میں قائم ہوئی تھی، جس کے اراکین میں پاکستان، بھارت، ایران، قازقستان، چین، کرغزستان، روس، تاجکستان اور ازبکستان شامل ہیں۔ بیلاروس جولائی دو ہزار چوبیس میں مکمل رکن بن چکا ہے۔
مبصر ممالک میں افغانستان اور منگولیا جبکہ ڈائیلاگ پارٹنرز میں آذربائیجان، آرمینیا، بحرین، مصر، کمبوڈیا، قطر، کویت، مالدیپ، میانمار، نیپال، متحدہ عرب امارات، سعودی عرب، ترکی اور سری لنکا شامل ہیں۔
