نیوزڈیسک
اسلام آباد: چین کے صدر شی جن پنگ نے دہشت گردی کے خلاف جنگ میں پاکستان کی حمایت کا اعادہ کیا۔
صدر شی جن پنگ اور وزیر اعظم شہباز شریف کی ملاقات میں نائب وزیر اعظم اسحاق ڈار، فیلڈ مارشل عاصم منیر اور دیگر وزراء بھی موجود تھے۔
چینی صدر کا کہنا ہے کہ پاکستان چینی عملے، منصوبوں اور اداروں کی حفاظت کے مؤثر اقدامات یقینی بنائے۔
ملاقات انتہائی خوشگوار رہی اور دونوں رہنماؤں نے دوطرفہ اسٹریٹجک تعاون اور شراکت داری کو مزید مضبوط کرنے کا عزم کیا۔
شہباز شریف نے پاکستان کی سالمیت، خودمختاری اور اقتصادی ترقی کے لیے چین کی غیرمتزلزل حمایت کی تعریف کی اور بیلٹ اینڈ روڈ انیشی ایٹو کے تحت سی پیک کی اہمیت کو سراہا۔
وزیر اعظم نے سی پیک کے اگلے مرحلے کے لیے تعاون جاری رکھنے کی خواہش کا اعادہ کیا اور صدر شی جن پنگ کے عالمی اقدامات کی حمایت کی۔
صدر شی جن پنگ کا مزید کہنا ہے کہ چین اقتصادی ترقی کے تمام شعبوں میں پاکستان کی مدد جاری رکھے گا، اور سی پیک کے دوسرے مرحلے میں اہم اقتصادی شعبوں پر توجہ دی جائے گی۔
وزیر اعظم شہباز شریف تیانجن سے بلٹ ٹرین کے ذریعے بیجنگ پہنچے، جہاں نیشنل پیپلز کانگریس کی اسٹینڈنگ کمیٹی نے ان کا استقبال کیا۔
شہباز شریف عالمی فاشزم کے خلاف جنگ کی 80ویں سالگرہ میں شریک ہوں گے اور چین پاکستان بزنس ٹو بزنس کانفرنس میں خطاب کریں گے۔
