تہران: ایران نے امریکہ اور اسرائیل کے مشترکہ حملوں کے بعد بھرپور جوابی کارروائی کا اعلان کر دیا ہے۔
ایرانی پارلیمنٹ کے قومی سلامتی کمیشن کے سربراہ ابراہیم عزیزی نے اسرائیل اور امریکہ کے حملوں پر سخت ردِعمل دیتے ہوئے خبردار کیا کہ صورتحال اب ان کے قابو سے باہر ہو سکتی ہے۔
سوشل میڈیا پر جاری بیان میں عزیزی نے کہا:
“ہم نے تمہیں پہلے ہی خبردار کیا تھا! تم نے اب ایک ایسے راستے پر قدم رکھا ہے جس کا انجام اب تمہارے اختیار میں نہیں رہا۔”
ایران کی تیاری اور انتباہ
غیر ملکی خبر رساں ادارے ’رائٹرز‘ کے مطابق ایک اعلیٰ ایرانی عہدیدار نے تصدیق کی کہ تہران ان حملوں کا جواب دینے کے لیے بھرپور تیاری کر رہا ہے۔
عہدیدار نے کہا کہ امریکہ اور اسرائیل کی جارحیت کا جواب انتہائی سخت اور تباہ کن (Crushing) ہو گا، اور ایران اپنی خودمختاری پر ہونے والے کسی بھی حملے کو برداشت نہیں کرے گا۔
اسرائیل کا حملہ اور حفاظتی اقدامات
واضح رہے کہ جنگی جنون میں مبتلا اسرائیل نے امریکہ کے ساتھ مل کر ایران پر حملہ کر دیا۔ عالمی خبر رساں ادارے کے مطابق ایرانی سپریم لیڈر آیت اللہ خامنہ ای اس وقت تہران میں موجود نہیں تھے اور انہیں محفوظ مقام پر منتقل کر دیا گیا تھا۔
اسرائیلی میڈیا کا دعویٰ ہے کہ آپریشن میں ایران کے کسی اعلیٰ حکومتی عہدیدار کو نشانہ بنایا گیا، اور حملے کی تاریخ و منصوبہ بندی کئی ہفتے قبل طے کی گئی تھی۔
تہران اور دیگر شہروں میں صورتحال
الجزیرہ کے مطابق، تہران کے علاوہ ایران کے اصفہان، کرمانشاہ اور قم میں بھی زور دار دھماکوں کی آوازیں سنائی دیں۔ حملوں کے بعد تہران کے کچھ حصوں میں موبائل فون لائنز منقطع ہو گئیں اور انٹرنیٹ کی رفتار میں شدید کمی ریکارڈ کی گئی، جس سے مواصلاتی نظام متاثر ہوا۔
