کراچی (ویب ڈیسک) — پاکستان اسٹاک مارکیٹ کاروباری ہفتے کے پہلے دن شدید مندی کا شکار ہو گئی، جس کے نتیجے میں ہنڈرڈ انڈیکس منٹوں میں ہزاروں پوائنٹس گر کر 148,042 پوائنٹس پر آگیا۔
تفصیلات کے مطابق پاکستان اسٹاک ایکسچینج (PSX) میں کاروبار کھلتے ہی ہنڈرڈ انڈیکس میں 7,322 پوائنٹس کی کمی ریکارڈ کی گئی، اور حصص کی دھڑا دھڑ فروخت کے باعث انڈیکس مزید 9,786 پوائنٹس کی کمی کے بعد 146,480 پوائنٹس پر بند ہوا۔
شدید مندی کے باعث مارکیٹ میں 5 فیصد سے زائد کی گراوٹ دیکھنے کو ملی، جس پر “سیفٹی والو” متحرک کیا گیا اور ریگولیٹری قوانین کے تحت ٹریڈنگ ایک گھنٹے کے لیے روک دی گئی۔ کاروبار کی دوبارہ بحالی کے بعد بھی مارکیٹ میں دباؤ برقرار رہا۔
ماہرینِ معیشت کا کہنا ہے کہ اچانک اور بڑی گراوٹ نے سرمایہ کاروں میں بے یقینی کی لہر دوڑا دی ہے اور مارکیٹ میں فی الحال شدید دباؤ موجود ہے۔
