امریکی رپورٹ: ایران نے مطالبات نہ مانے تو مجتبیٰ خامنہ ای کو نشانہ بنایا جا سکتا ہے
ویب ڈیسک: امریکی اخبار وال اسٹریٹ جرنل نے دعویٰ کیا ہے کہ اگر ایران امریکی مطالبات تسلیم نہ کرے تو ایرانی سپریم لیڈر مجتبیٰ خامنہ ای کو نشانہ بنایا جا سکتا ہے۔
رپورٹ کے مطابق امریکی صدر ڈونلڈ ٹرمپ نے اپنے قریبی مشیروں کو آگاہ کیا ہے کہ اگر ایران جوہری پروگرام ختم کرنے سمیت امریکی مطالبات ماننے سے انکار کرتا ہے تو وہ مجتبیٰ خامنہ ای کے خلاف مہلک کارروائی کی حمایت کر سکتے ہیں۔
وال اسٹریٹ جرنل کے مطابق اس ممکنہ کارروائی کے لیے اسرائیل کی جانب سے آپریشن کیے جانے کا امکان بھی ظاہر کیا جا رہا ہے۔
رپورٹ میں کہا گیا ہے کہ ٹرمپ مجتبیٰ خامنہ ای کے بطور ایرانی سپریم لیڈر انتخاب پر خوش نہیں ہیں اور وہ اس سے قبل بھی انہیں ناقابل قبول قرار دے چکے ہیں۔
گزشتہ ہفتے ایک بیان میں امریکی صدر نے کہا تھا کہ ایران میں ایسا نیا رہنما ہونا چاہیے جو عالمی برادری کے لیے قابل قبول ہو۔
وال اسٹریٹ جرنل کے مطابق ٹرمپ نے واضح کیا ہے کہ اگر ایران اپنا جوہری پروگرام ختم نہیں کرتا تو وہ ایرانی قیادت کے خلاف کارروائی کی حمایت کریں گے، جس کے بعد خطے میں کشیدگی میں مزید اضافے کے خدشات ظاہر کیے جا رہے ہیں۔
دریں اثنا، ٹائم میگزین کو دیے گئے ایک انٹرویو میں ٹرمپ نے کہا کہ وہ یہ سب اس لیے نہیں کر رہے کہ آخر میں ایران میں ایک اور خامنہ ای سامنے آ جائے۔
