ڈونلڈ ٹرمپ نے ایران کے نئے سپریم لیڈر مجتبیٰ خامنہ ای کی تقرری کو ایک بار پھر مستردکردیا

واشنگٹن (ویب ڈیسک): ڈونلڈ ٹرمپ نے ایران کے نئے سپریم لیڈر مجتبیٰ خامنہ ای کی تقرری کو ایک بار پھر مسترد کرتے ہوئے کہا ہے کہ وہ اس انتخاب سے خوش نہیں اور خطے میں امن قائم رہنا مشکل دکھائی دیتا ہے۔

فاکس نیوز کو دیے گئے انٹرویو میں امریکی صدر نے خدشہ ظاہر کیا کہ نئی ایرانی قیادت کے ساتھ مشرقِ وسطیٰ میں استحکام برقرار رکھنا آسان نہیں ہوگا۔

صدر ٹرمپ نے ایران کے خلاف امریکی فوجی کارروائی ’آپریشن ایپک فیوری‘ کا ذکر کرتے ہوئے دعویٰ کیا کہ پہلے ہی حملے میں ایران کے 50 فیصد میزائل ذخائر تباہ کر دیے گئے تھے۔ ان کا کہنا تھا کہ ماضی میں کسی امریکی صدر نے ایران پر براہِ راست حملہ نہیں کیا، تاہم انہوں نے یہ قدم اٹھا کر اپنی طاقت کا مظاہرہ کیا۔

ایران کے ساتھ ممکنہ مذاکرات کے حوالے سے صدر ٹرمپ نے کہا کہ اطلاعات ہیں تہران بات چیت کے لیے بے تاب ہے، لیکن اس وقت مذاکرات ضروری نہیں۔ انہوں نے واضح کیا کہ اگر مستقبل میں ایران کی جانب سے مناسب شرائط پیش کی گئیں تو ہی مذاکرات پر غور کیا جائے گا۔