اسلام آباد پاکستان میں فائیو جی اسپیکٹرم کی نیلامی 500 ملین ڈالر کی سرمایہ کاری کے ساتھ کامیابی سے مکمل ہو گئی ہے۔میڈیا رپورٹس کے مطابق فائیو جی اسپیکٹرم کی نیلامی میں بڑی ٹیلی کام کمپنیوں نے حصہ لیا۔ کامیاب بولی دہندگان میں زونگ، یوفون اور جاز (ویون گروپ) شامل ہیں۔مشیر خزانہ خرم شہزاد کا کہنا ہے کہ فائیو جی کی کامیاب نیلامی پاکستان میں ٹیکنالوجی کے شعبے میں غیر ملکی سرمایہ کاری کے بڑھتے ہوئے اعتماد کی علامت ہے۔ ان کے مطابق یہ سرمایہ کاری ملکی معیشت اور اصلاحات پر عالمی کمپنیوں کے اعتماد کو ظاہر کرتی ہے۔انہوں نے مزید کہا کہ فائیو جی سروس کے آغاز سے ڈیجیٹل معیشت کو فروغ ملے گا اور ملک میں تیز رفتار انٹرنیٹ کی سہولت بہتر ہو جائے گی۔ اس موقع پر کامیاب کمپنی جاز نے آئندہ تین سال میں مزید ایک ارب ڈالر سرمایہ کاری کرنے کا بھی اعلان کیا ہے۔
