اقوام متحدہ کی سلامتی کونسل میں ایران کے خلیجی ممالک پر حملوں کے خلاف پیش کی گئی قرارداد بھاری اکثریت سے منظور کر لی گئی۔تفصیلات کے مطابق ایران کی جانب سے خلیجی ممالک پر میزائل اور ڈرون حملوں کی مذمت میں یہ قرارداد بحرین نے پیش کی تھی، جس میں خلیج تعاون کونسل کے رکن ممالک اور اردن پر ہونے والے حملوں کی شدید مذمت کی گئی۔سلامتی کونسل کے 15 میں سے 13 ارکان نے قرارداد کے حق میں ووٹ دیا۔ پاکستان نے بھی قرارداد کے حق میں ووٹ دے کر ایرانی حملوں کی مذمت کی حمایت کی۔دوسری جانب روس اور چین نے ایران کے خلاف ووٹنگ کے عمل میں حصہ نہیں لیا۔قرارداد میں ایران سے مطالبہ کیا گیا ہے کہ وہ خلیجی ممالک پر حملے فوری طور پر بند کرے، خطے میں کشیدگی کم کرے اور بین الاقوامی قوانین کی پاسداری کرے۔سلامتی کونسل میں بحرین کی جانب سے پیش کی گئی اس قرارداد کو مجموعی طور پر 135 ممالک کی اخلاقی حمایت حاصل تھی۔ قرارداد میں واضح کیا گیا کہ خطے کے اقتصادی مراکز اور خود مختاری پر حملے ناقابل قبول ہیں۔
