اسلام آباد میں ہونے والی بارش کے باعث شہر کے مختلف علاقوں میں ٹریفک کی روانی شدید متاثر ہو گئی ہے۔ سڑکوں پر پانی جمع ہونے اور دیگر رکاوٹوں کی وجہ سے شہریوں کو آمد و رفت میں مشکلات کا سامنا ہے۔ٹریفک پولیس کے مطابق فیض آباد، سکائی ویز اڈہ سائیڈ اور ترامڑی چوک سمیت کئی مقامات پر بارش کا پانی کھڑا ہونے سے گاڑیوں کی نقل و حرکت سست پڑ گئی ہے۔ پارک روڈ انڈر پاس پر جاری ترقیاتی کام جبکہ کلب روڈ پر درخت گرنے کے باعث بھی ٹریفک کی صورتحال متاثر ہوئی ہے۔
حکام کا کہنا ہے کہ بارش کے باعث سڑکیں پھسلن کا شکار ہو گئی ہیں، جس کے سبب گاڑیوں کی رفتار کم ہو گئی ہے۔ ٹریفک پولیس کے اہلکار مختلف مقامات پر موجود ہیں اور ٹریفک کی روانی کو بہتر بنانے کی کوشش کر رہے ہیں۔شہریوں کو ہدایت کی گئی ہے کہ بارش کے دوران احتیاطی تدابیر اختیار کریں، فوگ لائٹس کا استعمال کریں، رفتار کم رکھیں اور لین کی پابندی کریں۔ موٹرسائیکل سواروں کو خاص طور پر بائیں جانب محتاط انداز میں سفر کرنے کی تاکید کی گئی ہے۔ٹریفک پولیس نے شہریوں کو مشورہ دیا ہے کہ سفر کے لیے اضافی وقت رکھیں اور کسی بھی مدد کے لیے ہیلپ لائن 1915 یا پکار 15 پر رابطہ کریں۔
