لاہور: حال ہی میں رشتۂ ازدواج میں منسلک ہونے والی پاکستانی اداکارہ مومنہ اقبال کی رخصتی کی تاریخ سے متعلق قیاس آرائیوں کا سلسلہ بالآخر ختم ہوگیا ہے۔ اداکارہ کی بہن اور قانونی مشیر رمشا اقبال نے مداحوں کے سب سے زیادہ پوچھے جانے والے سوال کا جواب دے دیا۔
مومنہ اقبال کی شادی کی تصاویر اور ویڈیوز سوشل میڈیا پر وائرل ہونے کے بعد مداحوں میں یہ تجسس پایا جا رہا تھا کہ آیا اداکارہ کی رخصتی ہو چکی ہے یا نہیں۔
ایک حالیہ انٹرویو میں رمشا اقبال نے وضاحت کرتے ہوئے بتایا کہ اب تک ہونے والی تمام تقریبات شادی کی خوشی منانے کے لیے تھیں، جبکہ مومنہ اقبال کی رخصتی ابھی نہیں ہوئی۔ ان کے مطابق اداکارہ کی رخصتی رواں سال نومبر یا دسمبر میں متوقع ہے۔
رمشا اقبال نے اس موقع پر مومنہ اقبال سے متعلق جاری قانونی معاملے پر بھی گفتگو کی۔ ان کا کہنا تھا کہ نیشنل سائبر کرائم انویسٹی گیشن ایجنسی (NCCIA) کی جانب سے کی جانے والی کارروائی کے بعد خاندان نے سکھ کا سانس لیا ہے۔ انہوں نے دعویٰ کیا کہ اصل شواہد اور بروقت دستاویزات نے مقدمے کے اندراج میں اہم کردار ادا کیا۔
رمشا اقبال کے مطابق ملزم کے پاس مومنہ اقبال کی کوئی نجی ویڈیو موجود نہیں تھی، تاہم وہ مبینہ طور پر مصنوعی ذہانت (AI) کی مدد سے جعلی ویڈیوز بنا کر سوشل میڈیا پر پھیلانے کی دھمکیاں دے رہا تھا۔
انہوں نے بتایا کہ قانونی تنازع اور اس سے جڑے دباؤ نے مومنہ اقبال کو ذہنی طور پر متاثر کیا، جس کے باعث خاندان نے شادی کے بعد مختلف تقریبات کا اہتمام کیا تاکہ خوشی کا ماحول برقرار رکھا جا سکے اور اداکارہ کے حوصلے بلند رہیں۔
رمشا اقبال کا کہنا تھا کہ شادی کی تقریبات مکمل ہونے کے باوجود مومنہ اقبال کی رخصتی ابھی باقی ہے اور خاندان مناسب وقت پر یہ مرحلہ بھی مکمل کرے گا۔
