اسلام آباد: پاکستان ایئرپورٹس اتھارٹی (پی اے اے) نے مون سون سیزن کے دوران پرندوں کے طیاروں سے ٹکراؤ کے خطرات کو کم کرنے اور فضائی آپریشنز کی حفاظت یقینی بنانے کے لیے لاہور کے علامہ اقبال انٹرنیشنل ایئرپورٹ پر روزانہ کی بنیاد پر رن وے عارضی طور پر بند رکھنے کا اعلان کیا ہے۔
پی اے اے کی جانب سے جاری نوٹس ٹو ایئر مین (نوٹام) کے مطابق 5 جولائی سے 15 ستمبر 2026 تک ایئرپورٹ کے دونوں رن وے روزانہ صبح 5 بج کر ایک منٹ سے صبح 8 بجے تک معمول کی پروازوں کے لیے بند رہیں گے۔ اس دوران ایئرپورٹ کے اطراف پرندوں کی سرگرمی اپنے عروج پر ہوتی ہے۔
اتھارٹی کے مطابق مون سون کے موسم میں ایئرپورٹ اور اس کے اطراف، خصوصاً 3 ہزار فٹ سے کم بلندی پر، پرندوں کی نقل و حرکت میں نمایاں اضافہ ہو جاتا ہے، جس کے باعث ٹیک آف اور لینڈنگ کے دوران طیاروں کو برڈ اسٹرائیک کا خطرہ بڑھ جاتا ہے۔
پی اے اے نے پائلٹس کو ہدایت کی ہے کہ وہ لینڈنگ اور ٹیک آف کے دوران غیر معمولی احتیاط برتیں، جبکہ ایئرلائنز کو ممکنہ تاخیر یا ہولڈنگ پیٹرن کی صورت میں اضافی ایندھن ساتھ رکھنے کی بھی ہدایت کی گئی ہے۔
اتھارٹی نے واضح کیا کہ یہ عارضی پابندیاں اس کے سالانہ مون سون سیفٹی پلان کا حصہ ہیں، جن کا مقصد صرف برڈ اسٹرائیک کے خطرے کو کم کرنا ہے تاکہ فضائی آپریشنز کو محفوظ رکھا جا سکے اور معمول کی پروازوں میں کم سے کم خلل آئے۔
پی اے اے کے مطابق مقررہ اوقات کے علاوہ تمام کمرشل پروازیں معمول کے مطابق جاری رہیں گی، جبکہ کسی بھی ہنگامی لینڈنگ کی صورت میں رن وے فوری طور پر دستیاب ہوگا۔
اتھارٹی کا کہنا ہے کہ یہ موسمی حفاظتی اقدامات مون سون کے دوران محفوظ اور مؤثر فضائی آپریشنز کو یقینی بنانے کے عزم کا اظہار ہیں۔
