اٹلانٹا: انگلینڈ کے ہیڈ کوچ تھامس ٹوخل نے کہا ہے کہ ان کی ٹیم فیفا ورلڈ کپ کے پری کوارٹر فائنل میں میزبان میکسیکو کے خلاف میچ سے قبل میکسیکو سٹی کی بلند سطحِ سمندر سے مکمل طور پر ہم آہنگ نہیں ہو سکے گی، کیونکہ اس کے لیے دستیاب وقت بہت کم ہے۔
انگلینڈ نے بدھ کو اٹلانٹا میں کھیلے گئے میچ میں کانگو ڈی آر کو 1-2 سے شکست دے کر ناک آؤٹ مرحلے میں جگہ بنائی۔ کانگو ڈی آر کے برائن سیپینگا نے ابتدائی برتری دلائی، تاہم کپتان ہیری کین نے آخری 15 منٹ میں دو گول کر کے انگلینڈ کو فتح دلائی۔ اس کے ساتھ ہی ہیری کین کے ورلڈ کپ میں مجموعی گولز کی تعداد 13 جبکہ موجودہ ٹورنامنٹ میں پانچ ہوگئی۔
اب انگلینڈ کا مقابلہ اتوار کو میکسیکو سٹی کے تاریخی ازٹیکا اسٹیڈیم میں میزبان میکسیکو سے ہوگا۔ یہ اسٹیڈیم سطح سمندر سے تقریباً 2,240 میٹر (7,220 فٹ) کی بلندی پر واقع ہے، جہاں کم فضائی دباؤ کھلاڑیوں کی کارکردگی کو متاثر کر سکتا ہے۔
میچ کے بعد میڈیا سے گفتگو کرتے ہوئے تھامس ٹوخل نے کہا کہ میکسیکو سٹی کی اونچائی ان کی ٹیم کے لیے ایک بڑا چیلنج ہوگی۔
انہوں نے کہا، “ہم صرف چار دن میں جسمانی طور پر اس اونچائی کے مطابق خود کو ڈھال نہیں سکتے، یہ تقریباً ناممکن ہے۔”
ٹوخل نے کہا کہ ان کی ٹیم کو صرف اونچائی ہی نہیں بلکہ سفر، میزبان ٹیم کے شائقین کا دباؤ اور دیگر حالات کا بھی سامنا کرنا ہوگا، تاہم کھلاڑی ان تمام چیلنجز کے لیے ذہنی طور پر تیار ہیں۔
انہوں نے مزید کہا، “یہ ورلڈ کپ کے سب سے بڑے اور دلچسپ مقابلوں میں سے ایک ہوگا۔ ہمیں کئی مشکلات کا سامنا ہوگا، لیکن ہم ان سے نمٹنے کے لیے تیار ہیں۔”
انگلینڈ کے کوچ نے ٹیم کی تیاریوں سے متعلق خدشات کا بھی ذکر کیا اور کہا کہ انہیں یقین نہیں کہ سفر مکمل طور پر ہموار ہوگا یا ہوٹل کے باہر شور شرابے جیسے مسائل پیش آئیں گے، تاہم ٹیم ہر صورتحال کا مقابلہ کرنے کے لیے تیار ہے۔
ٹوخل نے کہا کہ انگلینڈ نے ٹورنامنٹ سے قبل فلوریڈا میں تربیتی کیمپ لگا کر گرمی اور نمی والے موسم سے خود کو ہم آہنگ کر لیا ہے، اس لیے موسم ان کے لیے مسئلہ نہیں ہوگا، البتہ بلند مقام کی فضا سے مطابقت پیدا کرنے کے لیے زیادہ وقت درکار ہوتا ہے۔
ورلڈ کپ کے اس پری کوارٹر فائنل کے فاتح کا کوارٹر فائنل میں مقابلہ برازیل یا ناروے سے ہوگا۔
