اسلام آباد: پاکستان پیپلز پارٹی کے رکن قومی اسمبلی آغا رفیع اللہ نے وزیر اعظم شہباز شریف کو خط لکھ کر وزارتِ خارجہ کے دستاویزات کی تصدیق کے موجودہ نظام پر تحفظات کا اظہار کرتے ہوئے اسے جدید، ڈیجیٹل اور عوام دوست بنانے کا مطالبہ کیا ہے۔
خط میں آغا رفیع اللہ نے کہا کہ فارن آفس کے باہر شہریوں کی طویل قطاریں اور رش تشویشناک ہے، جبکہ دور دراز علاقوں سے آنے والے سائلین کو دستاویزات کی تصدیق کے لیے سفری اخراجات کے ساتھ طویل انتظار بھی کرنا پڑتا ہے۔
انہوں نے مطالبہ کیا کہ دستاویزات کی تصدیق کا نظام آؤٹ سورس کیا جائے، ملک بھر میں سہولت مراکز قائم کیے جائیں اور درخواست و فیس جمع کرانے کا عمل آن لائن کیا جائے۔ ان کے مطابق فارن آفس کو کیو آر کوڈ کے ذریعے دستاویزات کی ڈیجیٹل تصدیق کا نظام بھی متعارف کرانا چاہیے۔آغا رفیع اللہ کا کہنا تھا کہ ان اصلاحات سے تصدیقی نظام کی کارکردگی اور شفافیت میں بہتری آئے گی، شہریوں کے وقت اور سفری اخراجات میں کمی ہوگی، جبکہ یہ تجاویز حکومت کے ڈیجیٹل پاکستان اور ای گورننس وژن سے بھی ہم آہنگ ہیں
