ممبئی: بالی ووڈ اداکار سلمان خان اپنی پرانی دوست اور ساتھی اداکارہ کترینہ کیف کی حمایت میں سامنے آگئے ہیں۔ انہوں نے اداکارہ کے ماں بننے کے بعد وزن میں اضافے پر سوشل میڈیا پر ہونے والی تنقید اور نامناسب تبصروں کو آڑے ہاتھوں لیا ہے۔
کترینہ کیف حال ہی میں اپنے شوہر اور اداکار وکی کوشل کے ہمراہ مکیش اور نیتا امبانی کی جانب سے منعقد کی جانے والی گنپتی تقریبات میں شریک ہوئی تھیں۔ تقریب سے سامنے آنے والی تصاویر اور ویڈیوز سوشل میڈیا پر تیزی سے وائرل ہوئیں، تاہم ان کی ظاہری شکل اور وزن بھی آن لائن بحث کا موضوع بن گیا۔
کچھ صارفین نے کترینہ کے وزن میں اضافے پر نامناسب تبصرے کیے، جس کے بعد اب سلمان خان نے ایسے سوشل میڈیا رویوں پر کھل کر بات کی ہے۔
’کسی کو نیچا دکھا کر پیسے کما رہے ہیں‘
اپنے رئیلٹی شو ’بگ باس 20‘ میں گفتگو کے دوران سلمان خان نے ان افراد کو تنقید کا نشانہ بنایا جو سوشل میڈیا پر مشہور شخصیات کے جسم، وزن، شکل و صورت یا ذاتی زندگی کو مذاق کا موضوع بناتے ہیں۔
سلمان خان کے مطابق بعض لوگ سوشل میڈیا پر دوسروں کو نشانہ بنا کر پیسہ کمانے کی کوشش کرتے ہیں۔ ان کا کہنا تھا کہ ٹرولنگ کے دوران کسی کی شکل، جسمانی ساخت، خاندان، کیریئر میں ناکامی یا ذاتی زندگی جیسے معاملات کو بھی نشانہ بنایا جاتا ہے۔
اداکار نے کہا کہ کسی کو نیچا دکھا کر پیسے کمانا دراصل انسان کی پرورش اور رویے کی عکاسی کرتا ہے۔
کترینہ کے لیے سلمان کا واضح پیغام
کترینہ کیف کے حوالے سے بات کرتے ہوئے سلمان خان نے کہا کہ ماں بننے کے بعد وزن میں اضافہ ہونا ایک فطری عمل ہے۔
انہوں نے کہا کہ حمل کے دوران ہر خاتون کے جسم میں تبدیلیاں آتی ہیں اور وزن بڑھ سکتا ہے، جبکہ فلموں میں واپسی کے بعد اداکارہ دوبارہ اپنی فٹنس پر توجہ دے سکتی ہیں۔
سلمان نے اس بات پر بھی سوال اٹھایا کہ جو لوگ خود اپنی ظاہری شکل یا جسمانی ساخت کے حوالے سے عدم تحفظ کا شکار ہوسکتے ہیں، وہ دوسروں کے وزن اور شکل و صورت پر تنقید کیسے کر سکتے ہیں۔
ان کا کہنا تھا کہ کترینہ کو اس وقت اپنے خاندان کے ساتھ سکون سے وقت گزارنے دینا چاہیے۔
’آپ ہر وقت 60 سال کے ہیرو جیسے نہیں دکھ سکتے‘
سلمان خان نے گفتگو کے دوران خود پر ہونے والی سوشل میڈیا ٹرولنگ کا بھی ذکر کیا۔
اپنی عمر کے حوالے سے ہونے والی تنقید کا حوالہ دیتے ہوئے انہوں نے کہا کہ وقت کے ساتھ انسان کی شکل و صورت تبدیل ہوتی ہے اور یہ ایک فطری عمل ہے۔ اداکار نے طنزیہ انداز میں کہا کہ وہ 60 برس کے ہوچکے ہیں، اس لیے ان سے یہ توقع نہیں کی جا سکتی کہ وہ ہمیشہ ’میں نے پیار کیا‘ کے دور کے ہیرو جیسے نظر آئیں۔
سلمان نے اس رویے پر بھی سوال اٹھایا کہ آخر سوشل میڈیا پر کسی کو ٹرول کرنے کا مقصد کیا ہوتا ہے اور لوگ ایسا کیوں کرتے ہیں۔
انہوں نے یہ دعویٰ بھی کیا کہ بعض اوقات پروڈیوسرز یا اداکار مشہور شخصیات کو آن لائن نشانہ بنانے کے لیے لوگوں کو معاوضہ دے سکتے ہیں، تاہم انہوں نے اس دعوے کے حوالے سے کوئی مخصوص نام یا ثبوت پیش نہیں کیا۔
کترینہ کیف اور سلمان خان کی دوستی اور پیشہ ورانہ وابستگی کئی برسوں پر محیط ہے، جبکہ دونوں متعدد کامیاب فلموں میں بھی ایک ساتھ کام کر چکے ہیں۔ سلمان کی حالیہ گفتگو نے ایک بار پھر اس بحث کو نمایاں کیا ہے کہ سوشل میڈیا پر مشہور شخصیات کی نجی زندگی اور جسمانی تبدیلیوں کو کس حد تک عوامی تبصروں کا موضوع بنایا جانا چاہیے۔
