نئی دہلی : بھارتی کرکٹ میں میچ فکسنگ اور سٹے بازی سے متعلق نئے الزامات سامنے آئے ہیں، جہاں سابق فرسٹ کلاس کرکٹر رجت بھاٹیہ نے انڈین پریمیئر لیگ (آئی پی ایل) اور ڈومیسٹک کرکٹ میں مبینہ بے ضابطگیوں کے حوالے سے دعوے کیے ہیں۔
بھارتی میڈیا رپورٹس کے مطابق رجت بھاٹیہ نے ایک مبینہ ’سٹنگ آپریشن‘ کے دوران دعویٰ کیا کہ آئی پی ایل 2025 کے بعض میچوں سے قبل حتمی پلیئنگ الیون کی معلومات لندن میں موجود بک میکرز کے ساتھ شیئر کی جاتی تھیں۔
رپورٹس میں آئی پی ایل 2025 کے پانچ میچوں پر بھی شکوک و شبہات کا ذکر کیا گیا ہے، تاہم ان میچوں میں مبینہ فکسنگ کے حوالے سے کوئی باضابطہ تصدیق سامنے نہیں آئی۔
بھاٹیہ نے الزام عائد کیا کہ چنئی سپر کنگز سے وابستہ ونیش بیدی مبینہ طور پر میچ سے قبل پلیئنگ الیون کی معلومات حاصل کرتے اور انہیں اسنیپ چیٹ کے ذریعے لندن میں موجود بک میکرز تک پہنچاتے تھے۔
انہوں نے دعویٰ کیا کہ اس معلومات کے عوض تقریباً 30 ملین بھارتی روپے (3 کروڑ روپے) ادا کیے گئے، جبکہ مبینہ طور پر معلومات کی ترسیل کے لیے کوڈز اور ایموجیز کے استعمال کی تربیت بھی دی جاتی تھی۔
سابق کرکٹر نے 2018 کی سید مشتاق علی ٹرافی میں بھی مبینہ میچ فکسنگ کے الزامات عائد کیے۔ ان کا دعویٰ تھا کہ آئی پی ایل کے بعد ڈومیسٹک کرکٹ میں مبینہ فکسنگ کے لیے انہیں فی میچ تقریباً 4 ملین بھارتی روپے (40 لاکھ روپے) ادا کیے گئے۔
تاہم، ان دعوؤں کی آزادانہ یا باضابطہ طور پر تصدیق نہیں ہوئی۔ بھارتی کرکٹ حکام یا متعلقہ تفتیشی اداروں کی جانب سے تحقیقات یا کسی حتمی نتیجے کے سامنے آنے تک ان الزامات کو محض دعووں کے طور پر ہی دیکھا جا رہا ہے۔
