نیوز ڈیسک
ہیملٹن: ٹم سیفرٹ اور گلین فلپس کی جارحانہ بیٹنگ کی بدولت نیوزی لینڈ نے پانچویں اور آخری ٹی 20 میچ میں بھارت کو 7 وکٹوں سے شکست دے دی، تاہم ابتدائی تین میچز میں مسلسل کامیابی کی بدولت بھارت نے پانچ میچوں کی سیریز 2-3 سے اپنے نام کرلی۔
اتوار کو ہیملٹن میں کھیلے گئے سیریز کے آخری مقابلے میں نیوزی لینڈ نے 192 رنز کا ہدف صرف 18 اوورز میں 3 وکٹوں کے نقصان پر حاصل کرلیا۔ میزبان ٹیم نے ابتدا ہی سے جارحانہ بیٹنگ کرتے ہوئے بھارتی بولرز کو دباؤ میں رکھا اور باآسانی کامیابی حاصل کی۔
نیوزی لینڈ کی فتح میں ٹم سیفرٹ نے مرکزی کردار ادا کیا۔ انہوں نے 50 گیندوں پر 93 رنز کی شاندار اننگز کھیلی، جس میں 11 چوکے اور 5 چھکے شامل تھے۔
گلین فلپس نے بھی بھرپور ساتھ دیتے ہوئے 38 گیندوں پر ناقابل شکست 65 رنز بنائے۔ ان کی اننگز میں 8 چوکے اور 3 چھکے شامل تھے، جب کہ ڈیرل مچل نے 16 گیندوں پر 29 رنز اسکور کرکے ٹیم کی کامیابی میں اہم کردار ادا کیا۔
بھارت کی جانب سے ارشدیپ سنگھ، ورون چکرورتی اور نتیش کمار ریڈی نے ایک، ایک وکٹ حاصل کی، تاہم بھارتی بولرز کی کوششیں نیوزی لینڈ کو ہدف کے حصول سے روکنے میں ناکام رہیں۔
ایشان اور شریاس کی نصف سنچریاں بھی بھارت کو نہ بچا سکیں
اس سے قبل نیوزی لینڈ نے ٹاس جیت کر بھارت کو پہلے بیٹنگ کی دعوت دی تو مہمان ٹیم نے مقررہ 20 اوورز میں 8 وکٹوں کے نقصان پر 191 رنز بنائے اور میزبان ٹیم کو 192 رنز کا ہدف دیا۔
بھارت کی جانب سے ایشان کشن نے جارحانہ بیٹنگ کرتے ہوئے 32 گیندوں پر 61 رنز بنائے، ان کی اننگز میں 5 چوکے اور 5 چھکے شامل تھے۔
کپتان شریاس آئر نے بھی شاندار کھیل کا مظاہرہ کرتے ہوئے 23 گیندوں پر 50 رنز اسکور کیے، جس میں 3 چوکے اور 4 چھکے شامل تھے۔ اس کے علاوہ نمن دھیر نے 33 اور نتیش کمار ریڈی نے 22 رنز بنائے۔
نیوزی لینڈ کے ایڈم ملنے نے تباہ کن بولنگ کرتے ہوئے 4 اوورز میں صرف 19 رنز دے کر 4 بھارتی کھلاڑیوں کو پویلین بھیجا، جب کہ نیتھن اسمتھ اور بلیئر ٹکنر نے 2، 2 وکٹیں حاصل کیں۔
آخری دو میچز میں نیوزی لینڈ کی واپسی، سیریز بھارت کے نام
پانچ میچوں کی ٹی 20 سیریز میں بھارت نے ابتدائی تینوں مقابلوں میں کامیابی حاصل کرکے ناقابل شکست برتری قائم کرلی تھی۔
بھارت نے پہلے اور دوسرے ٹی 20 میچ میں نیوزی لینڈ کو 4، 4 وکٹوں سے شکست دی، جب کہ تیسرے مقابلے میں 6 وکٹوں سے کامیابی حاصل کرکے سیریز اپنے نام کرلی۔
تاہم سیریز کے آخری دو میچز میں نیوزی لینڈ نے شاندار کم بیک کیا۔ میزبان ٹیم نے چوتھے ٹی 20 میں بھارت کو 87 رنز سے شکست دی، جب کہ آخری مقابلے میں بھی 7 وکٹوں سے کامیابی حاصل کی۔
یوں نیوزی لینڈ نے سیریز کے آخری دونوں میچز جیت کر اختتام فتح کے ساتھ کیا، تاہم بھارت ابتدائی تین فتوحات کی بدولت پانچ میچوں کی سیریز 2-3 سے جیتنے میں کامیاب رہا۔
