نیوز ڈیسک
ریاض: سعودی عرب کے دارالحکومت ریاض میں سعودی آرامکو کی عمارت کو نشانہ بنانے کی کوشش کے دوران عمارت کو معمولی نقصان پہنچا ہے، تاہم واقعے میں کوئی جانی نقصان یا زخمی ہونے کی اطلاع نہیں ملی۔
سعودی وزارتِ توانائی نے اتوار کو واقعے کی تصدیق کرتے ہوئے بتایا کہ حملے کے دوران گرنے والے ملبے کے باعث عمارت کی ایک منزل کو نقصان پہنچا، تاہم صورتِ حال پر قابو پالیا گیا۔
دوسری جانب سعودی اتحاد کے ترجمان کے مطابق حوثی باغیوں کی جانب سے ریاض کی طرف دو بیلسٹک اور ایک کروز میزائل داغے گئے، جنہیں سعودی فضائی دفاعی نظام نے ہدف تک پہنچنے سے پہلے ہی تباہ کردیا۔
ترجمان کے مطابق ایک کروز میزائل جنوبی ریجن جبکہ بیلسٹک میزائل مشرقی ریجن میں تباہ کیے گئے۔
ممکنہ حملوں کے پیش نظر دمام، ظہران، بقیق اور الہفوف میں شہریوں کو پیشگی وارننگ جاری کی گئی تھی۔ عرب میڈیا رپورٹس کے مطابق خطرہ ٹلنے کے بعد ان چاروں شہروں میں سکیورٹی الرٹ واپس لے لیا گیا۔
حکام کے مطابق میزائل حملوں کو ناکام بنانے کے باوجود ریاض میں آرامکو کی عمارت کو ملبہ گرنے سے نقصان پہنچا، تاہم کسی جانی نقصان کی اطلاع نہیں ملی۔
