ویب ڈیسک
بھارتی گلوکار ارجیت سنگھ نے پاکستانی عالمی شہرت یافتہ سُپر اسٹار اداکارہ ماہرہ خان سے معافی مانگ لی۔ یاد رہے کہ ماہرہ خان ایمی گالہ ایوارڈز کے سلسلے میں دبئی میں ہیں، جب انہیں گزشتہ روز بالی ووڈ کے گلوکار ارجیت سنگھ کے کنسرٹ میں دیکھا گیا۔
مختلف سوشل میڈیا پلیٹ فارمز پر ان کی ایک خوبصورت ویڈیو وائرل ہو رہی ہے، جس میں بھارتی گلوکار اعتراف کرتے ہیں کہ وہ کنسرٹ میں موجود سینکڑوں شائقین کے درمیان ماہرہ خان کو نہیں پہچان پائے۔
جیسے ہی انہیں اندازہ ہوا کہ موجودہ شائقین کے درمیان پاکستانی سُپر اسٹار موجود ہیں، انہوں نے دیگر کنسرٹ شرکاء کو بھی ان سے متعارف کروایا اور شناخت میں تاخیر کے لئے معافی مانگ لی۔
ویڈیو میں دیکھا جا سکتا ہے کہ بھارتی گلوکار اپنے کنسرٹ کو روک کر موجودہ سامعین سے بات کرتے ہیں اور انہیں اچھے انداز میں متعارف کرواتے ہیں۔
ارجیت سنگھ اپنی بات جاری رکھتے ہوئے مزید کہتے ہیں کہ میں انہیں پہچاننے کی کوش کر رہا تھا، پھر مجھے یاد آیا کہ میں نے تو ان کے لیے گانا گایا، خواتین و حضرات ہمارے درمیان ماہرہ خان موجود ہیں، جو میرے سامنے بیٹھی ہیں۔
گلوکار نے مزید کہا کہ میں ابھی ان ہی کی فلم کا گانا ’ظالمہ‘ گا رہا تھا اور یہ میرے ساتھ کھڑی ہوکر گنگنا رہی تھیں اور میں انہیں پہچان نہ سکا جس پر میں ان سے معذرت خواہ ہوں، آپ کا بہت بہت شکریہ۔
https://www.instagram.com/mahirahkhan/p/C6Um-J1BqRy/
اس موقع پر ماہرہ خان نے سیاہ لباس کا انتخاب کیا، جو ان کی خوبصورتی کو مزید نکھار رہا تھا۔ بعدازاں، اداکارہ ماہرہ خان نے اس کنسرٹ کی مختصر ویڈیو اپنے انسٹاگرام اکاؤنٹ سے بھی شیئر کی، اور ارجیت سنگھ کی عاجزی کی خوب تعریف کی۔
اداکارہ نے اپنی پوسٹ کے کیپشن میں لکھا کہ فنکار کو پرفارم کرتے ہوئے دیکھ کر نہات خوشی محسوس ہوتی ہے، لیکن اس سے بڑھ کر خوشی اس وقت ہوتی ہے جب ایک فنکار میں عاجزی دیکھی جائے، کیونکہ ایک بہترین فنکار جانتا ہے کہ وہ جو کچھ ہے، اس میں اس کا کمال نہیں ہے بلکہ خدا نے اسے اس صلاحیت سے نوازا ہے۔
