اسلام آباد:امریکا کی معروف ٹیکنالوجی کمپنی ایپل اپنے صارفین کے لیے جلد ایک سستا ترین آئی فون متعارف کرانے کی تیاری کر رہی ہے۔
غیر ملکی میڈیا کی رپورٹس کے مطابق ایپل آئی فون ایس ای (چوتھی نسل) کی تیاری پر کام کر رہا ہے، جو آئندہ برس 2025ء میں لانچ کیا جا سکتا ہے۔
اس نئے فون میں ایپل کی جدید ای آئی ماڈل پر مبنی خصوصیات شامل ہوں گی، اور فیس آئی ڈی کا آپشن بھی فراہم کیا جائے گا۔
بلومبرگ کی رپورٹ کے مطابق، آئی فون SE 4 کی باڈی آئی فون 14 کی طرح ہوگی اور اس میں ہوم بٹن نہیں ہوگا۔ تاہم، آئی فون 14 کے برعکس، اس میں 48 میگا پکسل کا کیمرا موجود ہوگا۔
یاد رہے کہ ایپل نے ایس ای سیریز کا آخری اپ ڈیٹڈ فون 2022 میں SE 3 کے نام سے لانچ کیا تھا، جس میں 12 میگا پکسل کا کیمرا تھا۔
فی الحال، آئی فون SE 3 (2022) ایپل کا سب سے سستا فون ہے، جس کی قیمت 429 ڈالرز ہے۔ تاہم، مبینہ طور پر آئی فون SE 4 کی قیمت اس سے کم ہونے کا امکان ہے۔
