اسلام آباد:پاکستان شوبز انڈسٹری کے معروف گلوکار و اداکار عمیر جسوال نے حال ہی میں اپنے نکاح کی تصویر شیئر کر کے اپنے مداحوں کو حیرت میں ڈال دیا۔
فوٹو اینڈ ویڈیو شیئرنگ پلیٹ فارم انسٹاگرام پر دل شکستہ گلوکار نے اپنی سابقہ اہلیہ و اداکارہ ثناء جاوید کے کرکٹر شعیب ملک سے شادی کے اعلان کے تقریباً 9 ماہ بعد اپنے خفیہ نکاح کا اعلان کیا ہے۔
عمیر جسوال نے 7 اکتوبر کو انسٹاگرام پر کریم کلر کی شیروانی اور پگڑی باندھے دولہا کے روپ میں اپنی تصویر شیئر کی۔
انہوں نے پوسٹ کے کیپشن میں ایک قرآنی آیت بھی شامل کی ہے جس کا مفہوم یہ ہے کہ عنقریب تمہارا رب تمہیں اتنا عطا کرے گا کہ تم راضی ہو جاؤ گے۔
گلوکار نے خدا کا شکر ادا کرتے ہوئے “الحمد لِلّٰہ” بھی لکھا، جس کے بعد ساتھی فنکاروں اور مداحوں کی جانب سے انہیں مبارک باد اور نیک خواہشات کا سلسلہ شروع ہو گیا۔
اگرچہ عمیر جسوال نے واضح طور پر نہیں کہا کہ وہ شادی کے بندھن میں بندھ گئے ہیں، لیکن ان کی تقریبِ نکاح کی تصاویر بنانے والے فوٹو گرافر نے اس کی تصدیق کی ہے۔
فوٹو گرافر نے بتایا کہ اداکار ایک نجی تقریب کے دوران نکاح کے بندھن میں بندھ گئے، جس پر انہوں نے گلوکار کو مبارک باد بھی پیش کی۔ عمیر جسوال نے اپنی دوسری شریکِ حیات کی شناخت ظاہر نہیں کی۔
یاد رہے کہ عمیر جسوال نے پہلی شادی اداکارہ ثناء جاوید سے جولائی 2020 میں کی تھی، مگر 2023 میں ان کے درمیان اختلافات اور طلاق کی افواہیں پھیل گئیں۔
علیحدگی اور طلاق کی افواہوں پر دونوں فنکاروں نے کبھی کوئی وضاحت نہیں کی۔ بعد ازاں، جنوری 2024 میں ثناء جاوید نے خاموشی سے سابق کپتان شعیب ملک سے دوسری شادی کر لی۔
