آندھرا پردیش:بھارت کی ریاست آندھرا پردیش میں پیاز بم کے دھماکے کے نتیجے میں ایک شخص ہلاک اور چھ زخمی ہو گئے۔
بھارتی میڈیا کے مطابق، پیاز بم دیوالی کے تہوار کے لیے خاص پٹاخہ سمجھا جاتا ہے۔
آندھرا پردیش میں دو موٹر سائیکل سوار افراد پیاز بم کی کھیپ لے جا رہے تھے کہ ایک مقامی مندر کے قریب موٹر سائیکل گڑھے سے ٹکرا گئی۔
اس دوران پٹاخے موٹر سائیکل سے گر کر پھٹ گئے، جس کے نتیجے میں دھماکے کی شدت آئی ای ڈی یا دیسی ساختہ بم کے دھماکے کی مانند تھی۔
جہاں دھماکا ہوا، وہاں گلی میں موجود دیگر چھ افراد بھی متاثر ہوئے۔ دھماکے کے نتیجے میں موٹر سائیکل مکمل طور پر تباہ ہو گئی، اور مرنے والے شخص کی لاش کے بھی ٹکڑے ٹکڑے ہو گئے۔
میڈیا رپورٹس کے مطابق، دھماکے کی آواز قریبی علاقوں میں بھی سنی گئی۔
