آسٹریلیا میں طوفان الفریڈ کی تباہی: لاکھوں افراد بجلی سے محروم، درجنوں زخمی

اسلام آباد:آسٹریلیا کے مشرقی ساحل پر طوفان “الفریڈ” نے تباہی مچا دی، جس کے نتیجے میں نظامِ زندگی درہم برہم ہو گیا۔

لاکھوں افراد بجلی سے محروم ہو گئے اور درجنوں افراد زخمی ہوئے۔ غیر ملکی میڈیا کے مطابق، طوفان الفریڈ نے ریاست کوئنز لینڈ اور نیو ساؤتھ ویلز میں شدید نقصان پہنچایا۔

تیز ہواؤں کی وجہ سے درخت اکھڑ گئے، کئی عمارتیں تباہ ہو گئیں، اور تین لاکھ سے زائد گھروں اور کاروباری مراکز کی بجلی معطل ہو گئی، جس سے تقریباً ساڑھے سات لاکھ افراد متاثر ہوئے۔
پولیس حکام کے مطابق، امدادی کارروائیوں کے دوران دو فوجی ٹرک آپس میں ٹکرا گئے، جس سے چھتیس افراد زخمی ہو گئے۔

ایمرجنسی سروسز کے مطابق، نیو ساؤتھ ویلز میں سولہ ہزار سے زائد افراد کو فوری طور پر نقل مکانی کے احکامات جاری کیے گئے ہیں، کیونکہ مزید بارشوں اور تیز ہواؤں کا خدشہ ہے۔
حکام نے شہریوں کو محتاط رہنے اور غیر ضروری نقل و حرکت سے گریز کرنے کی ہدایت کی ہے۔

مزید پرئیے:https://urdu.thepenpk.com/?p=6393