نیوزڈیسک
مستونگ: صدرِ مملکت آصف علی زرداری نے بلوچستان کے ضلع مستونگ میں سیکیورٹی فورسز پر فتنۂ ہندوستان کے دہشت گردوں کے حملے کی شدید مذمت کی ہے۔
انہوں نے اسے ریاست پاکستان کے خلاف دشمن عناصر کی مایوس کن سازش قرار دیا اور شہداء میجر محمد رضوان طاہر، نائیک ابنِ امین اور لانس نائیک محمد یونس کو خراجِ عقیدت پیش کرتے ہوئے ان کے بلند درجات اور اہلِ خانہ کے لیے صبر کی دعا کی۔
صدر نے سیکیورٹی فورسز کی بروقت اور جرأت مندانہ کارروائی کو سراہتے ہوئے کہا کہ جوابی حملے میں دہشت گردوں کو جہنم واصل کرنا فورسز کی پیشہ ورانہ مہارت اور قومی عزم کا مظہر ہے۔
انہوں نے یقین دہانی کرائی کہ دہشت گردی کے خلاف جنگ میں پوری قوم سکیورٹی فورسز کے ساتھ کھڑی ہے، اور کسی قیمت پر دہشت گردوں کے ناپاک عزائم کو کامیاب نہیں ہونے دیا جائے گا۔
صدرمملکت کا کہنا تھا کہ بھارت کی سرپرستی میں سرگرم دہشت گرد عناصر کا جلد قلع قمع کیا جائے گا اور ملک کی سلامتی و خودمختاری پر کوئی سمجھوتہ نہیں ہوگا۔
شہباز شریف کی مستونگ حملے پر مزمت
وزیراعظم شہباز شریف نے بھی مستونگ حملے کی شدید مذمت کرتے ہوئے شہداء کے درجات کی بلندی کی دعا کی اور اہلِ خانہ سے تعزیت کا اظہار کیا۔
انہوں نے کہا کہ ملک سے دہشت گردی کے مکمل خاتمے کا عزم ہے اور سیکیورٹی فورسز کے اہلکار سیسہ پلائی دیوار کی مانند وطن کے دفاع میں ڈٹے ہوئے ہیں۔
وزیراعلیٰ پنجاب مریم نواز نے بھی دھماکے کی مذمت کرتے ہوئے شہداء کی قربانی کو لازوال قرار دیا اور لواحقین سے اظہارِ ہمدردی کیا۔
گورنر خیبرپختونخوا، فیصل کریم کنڈی نے بھی سیکیورٹی فورسز کو خراجِ تحسین پیش کیا اور کہا کہ قوم اپنی بہادر افواج کے شانہ بشانہ کھڑی ہے اور ان کی قربانیاں کبھی رائیگاں نہیں جائیں گی۔
