نیوزڈیسک
اسلام آباد: امریکا کے ایک حاضر سروس فوجی کو روس کو امریکی ٹینکوں سے متعلق حساس معلومات فراہم کرنے کے الزام میں گرفتار کر لیا گیا ہے۔
غیر ملکی میڈیا کے مطابق امریکی محکمۂ انصاف نے بائیس سالہ ٹیلر ایڈم لی کو حراست میں لیا ہے، جو ٹیکساس کے شہر ایل پاسو سے تعلق رکھتا ہے۔
استغاثہ کے مطابق، ٹیلر ایڈم لی پر الزام ہے کہ اس نے امریکی فوجی ٹینک ایم-1 ابراہم کے خفیہ معلومات ایک روسی انٹیلی جنس افسر کو فراہم کیں، جو مبینہ طور پر روسی شہریت کے عوض کی گئیں۔
بتایا گیا ہے کہ ٹیلر ایڈم لی کو امریکی فوج کی جانب سے حساس معلومات تک رسائی حاصل تھی، جس کا فائدہ اٹھاتے ہوئے اس نے ٹینکوں کی اسٹوریج اور آپریشنز سے متعلق تفصیلات فراہم کیں۔
محکمۂ انصاف کے مطابق، ٹیلر ایڈم لی نے ایک میموری کارڈ بھی روسی افسر کو فراہم کیا جس میں امریکی ٹینکوں اور دیگر فوجی گاڑیوں کے آپریشنز سے متعلق اہم معلومات موجود تھیں۔
گرفتاری سے قبل، ٹیلر ایڈم لی نے مبینہ طور پر اپنے رابطے کو پیغام بھیجا کہ “مشن مکمل ہو گیا ہے۔
واضح رہے کہ ایم-1 ابراہم ٹینک اس وقت یوکرین اور روس کے درمیان جاری جنگ میں بھی استعمال ہو رہے ہیں، جس بنا پر یہ معلومات روس کے لیے غیر معمولی اہمیت رکھ سکتی تھیں۔
