نیوزڈیسک
کراچی: گورنر سندھ کامران ٹیسوری نے بتایا کہ زائرین کے مسائل کو جلد از جلد حل کیا جائے گا تاکہ وہ محفوظ طریقے سے اپنے مقدس سفر پر روانہ ہو سکیں۔
ایم ڈبلیو ایم کے رہنماؤں کے ہمراہ میڈیا سے گفتگو کرتے ہوئے انہوں نے بتایا کہ فیصلہ کیا گیا ہے کہ زائرین کو بحفاظت ایران بھیجا جائے گا۔
اس مقصد کے لیے ہوائی سفر سے متعلق ایک کمیٹی قائم کر دی گئی ہے جو اڑتالیس گھنٹوں میں اپنا کام مکمل کرے گی۔
کامران ٹیسوری کے مطابق سکیورٹی مسائل حل ہوتے ہی زمینی راستے دوبارہ کھول دیے جائیں گے، جبکہ زائرین کے ویزا مسائل اور دیگر مطالبات پر بھی پیش رفت کی جائے گی۔
گزشتہ روز ایم ڈبلیو ایم کے ساتھ کامیاب مذاکرات کے بعد زائرین نے ایران روانگی مؤخر کرنے کا اعلان کیا تھا۔
گورنر سندھ نے کہا کہ کراچی سے قافلہ حب روانہ نہیں ہوگا اور اس حوالے سے وزیر داخلہ محسن نقوی سے بات ہو چکی ہے۔
پی آئی اے سے بھی رابطہ کیا جا رہا ہے تاکہ خصوصی پروازوں کا انتظام کیا جا سکے۔
انہوں نے مزید کہا کہ علامہ راجہ ناصر عباس نے مطالبہ کیا تھا کہ زائرین کو روڈ کے ذریعے جانے کی اجازت دی جائے، اور اس سلسلے میں ایرانی حکومت سے ویزا مدت بڑھانے پر بات کی جائے گی۔
گورنر سندھ کا مزید کہنا ہے کہ ان کی وزیر مملکت برائے داخلہ سینیٹر طلال چوہدری سے بھی ٹیلیفون پر بات ہوئی ہے جس میں زائرین کے مسائل اور ان کے حل پر تبادلہ خیال کیا گیا۔
انہوں نے تسلیم کیا کہ سکیورٹی فراہم کرنا ریاست کی ذمہ داری ہے اور حکومت اس سلسلے میں بھرپور اقدامات کر رہی ہے۔
