اسلام آباد: وزیراعظم شہباز شریف نے بتایا کہ فیلڈ مارشل سید عاصم منیر کی دلیرانہ قیادت میں پاک فوج نے افغانستان کی جانب سے سرحدی خلاف ورزیوں کا نہ صرف بھرپور جواب دیا بلکہ متعدد افغان پوسٹوں کو تباہ کر کے دشمن کو پسپائی پر مجبور کر دیا۔
اپنے بیان میں شہباز شریف نے افغانستان کی سرزمین سے پاکستان کے سرحدی علاقوں میں کی گئی اشتعال انگیزی کی شدید مذمت کی اور اس کے ردعمل میں پاک فوج کی مؤثر کارروائی پر انہیں خراج تحسین پیش کیا۔
انہوں نے کہا کہ ہمیں اپنی افواج کی پیشہ ورانہ صلاحیتوں پر فخر ہے، پاکستان کے دفاع پر کسی قسم کا سمجھوتا نہیں ہوگا، اور ہر جارحانہ اقدام کا مؤثر اور فیصلہ کن جواب دیا جائے گا۔
انہوں نے مزید کہا کہ پاکستان کا دفاع مضبوط اور قابل اعتماد ہاتھوں میں ہے، اور ہم دشمن کی کسی بھی کوشش کو ناکام بنانے کی بھرپور صلاحیت رکھتے ہیں۔
وزیراعظم نے مزید کہا کہ پاک فوج نے ماضی میں بھی ہر بیرونی جارحیت کا منہ توڑ جواب دیا ہے اور پوری قوم اپنی مسلح افواج کے شانہ بشانہ کھڑی ہے۔
انہوں نے یاد دہانی کروائی کہ پاکستان نے متعدد بار افغانستان کو آگاہ کیا ہے کہ ان کی سرزمین پر موجود دہشت گرد گروہ جیسے ’’فتنۃ الخوارج‘‘ اور ’’فتنۃ الہندوستان‘‘ پاکستان کے خلاف سرگرم ہیں۔
شہباز شریف نے اس بات پر زور دیا کہ ان گروہوں کو افغان عناصر کی حمایت حاصل ہے اور توقع ظاہر کی کہ افغان عبوری حکومت اس بات کو یقینی بنائے گی کہ اس کی سرزمین پاکستان کے خلاف دہشت گردی کے لیے استعمال نہ ہو۔
